Nashik News १ फेब्रुवारी ते ३१ मार्च २०२३ या कालावधीत कृषी उत्पन्न बाजार समिती, खासगी बाजार, थेट पणन अनुज्ञप्ती धारकाकडे अथवा ‘नाफेड’च्या खरेदी (NAFED Procurement) केंद्रात कांदा विक्री केलेल्या शेतकऱ्यांना अनुदान (Onion Subsidy) देण्याबाबत राज्य सरकारने निर्णय घेतला आहे. यासाठी अर्ज करण्याची मुदत ३ ते २० एप्रिल होती.

मात्र हजारो शेतकरी अर्ज करणे बाकी असल्याने पणन संचालनालयाने अर्ज करण्यास ३० एप्रिलपर्यंत मुदतवाढ दिली आहे. याबाबत पणन उपसंचालक मोहन निंबाळकर यांच्या स्वाक्षरीने पत्रक काढण्यात आले आहे.

फेब्रुवारी २०२३ च्या सुरूवातीपासून लेट खरीप कांद्याच्या दरातील घसरण आणि विविध शेतकरी संघटना आणि शेतकऱ्यांकडून होणारी अनुदानाची मागणी लक्षात घेता 'कांदा बाजारभावतील घसरण व उपाययोजना'अंतर्गत कांदा विक्री केलेल्या शेतकऱ्यांना ३५० रुपये प्रतिक्विंटल व जास्तीतजास्त २०० क्विंटल प्रतिशेतकरी या प्रमाणे अनुदान मंजूर करण्यात आले आहे.

हे अनुदान मिळविण्यासाठी अर्ज करण्याची मुदत ३ ते २० एप्रिल होती. मात्र अनेक शेतकरी कांदा अनुदान मिळण्यासाठी अर्ज करण्याचे बाकी राहिले आहेत. त्यामुळे कांदा उत्पादक शेतकरी, बाजार समितीचे पदाधिकारी आदींकडून अर्ज सादर करण्यासाठी मुदतवाढ देण्याची मागणी करण्यात आली होती. पणन संचालनालयाच्या निदर्शनास ही बाब आल्याने हा निर्णय घेण्यात आला.

‘वाढीव मुदतीची सूचना द्या’

मुदतवाढीबाबत ‘पणन’तर्फे याबाबत मुंबई वगळता जिल्ह्यातील सर्व सहकारी संस्थांच्या जिल्हा उपनिबंधकांना पत्र लिहिण्यात आले आहे. वाढीव मुदतीबाबतची सूचना जिल्ह्यातील सर्व बाजार समिती, खासगी बाजार, थेट पणन अनुज्ञप्ती धारक व नाफेड खरेदी केंद्रांना द्यावी, असे निंबाळकर यांनी कळविले आहे.