Parbhani News : गोपीनाथ मुंडे शेतकरी अपघात विमा योजना खंडित कालावधी ता.७ एप्रिल २०२२ ते २२ ऑगस्ट २०२२ या दरम्यान परभणी जिल्ह्यात ४४ प्रस्ताव दाखल होते. त्यापैकी मंजूर २७ प्रस्तावांतर्गत ५२ लाख रुपये अनुदान वितरित करण्यात आले आहे अशी माहिती कृषी विभागाच्या सूत्रांनी दिली.

अनुदान वितरित प्रस्तावांमध्ये परभणी, मानवत तालुक्यातील प्रत्येकी १ प्रस्तावांतर्गत प्रत्येकी २ लाख रुपये, गंगाखेड, पालम तालुक्यातील प्रत्येकी २ प्रस्तावांतर्गत प्रत्येकी ४ लाख रुपये, जिंतूर, पूर्णा तालुक्यातील प्रत्येकी ४ प्रस्तावांतर्गत प्रत्येकी ८ लाख रुपये, सोनपेठ तालुक्यातील ६ प्रस्तावांतर्गत ११ लाख रुपये, सेलू तालुक्यातील ७ प्रस्तावांतर्गत १३ लाख रुपये असे एकूण ५२ लाख रुपये अनुदान वाटप करण्यात आले.

या योजनेअंतर्गत जिल्ह्यात २०१९-२० मध्ये दाखल १०० पैकी ६२ प्रस्ताव मंजूर झाले तर २ प्रस्ताव प्रलंबित आहेत. २०२१-२२ मध्ये दाखल १०६ पैकी ५४ प्रस्ताव मंजूर झाले असून ३६ प्रस्ताव प्रलंबित आहेत.

राज्य शासनाच्या गोपीनाथ मुंडे शेतकरी अपघात विमा योजनेअंतर्गत अतिवृष्टीमुळे शेतकऱ्यांचा मृत्यू किंवा अपघात झालेल्या कुटुंबीयांच्या वारसदारांना १ ते २ लाख रुपयापर्यंत विमा संरक्षण उपलब्ध आहे.

अपघातग्रस्त शेतकऱ्यांच्या वारसदारांनी कृषी पर्यवेक्षक किंवा तालुका कृषी अधिकारी कार्यालयाशी संपर्क साधून विमा प्रस्ताव तत्काळ सादर करावेत असे आवाहन कृषी आयुक्तालयाचे विस्तार व प्रशिक्षण संचालक विकास पाटील यांनी केले आहे. अधिक माहितीसाठी विमा सल्लागार कंपनीच्या १८००२२०८१२ या टोल फ्री क्रमांकावर संपर्क साधावा.

अपघातग्रस्त शेतकरी कुटुंबीयांच्या वारसदारांनी युनिव्हर्सल सोंपो जनरल इन्शुरन्स कंपनी लिमिटेड या विमा कंपनीच्या १८००२२४०३० किंवा १८००२००४०३० या टोल फ्री क्रमांकावर पूर्व सूचनेची नोंद करावी. गोपीनाथ मुंडे शेतकरी सुरक्षा सानुग्रह अनुदान योजनेतील त्रुटी काढून शेतकरी अनुकूल कार्यपद्धती अवलंबली आहे.