पुणे  ः ‘कोरोना’च्या पार्श्वभूमीवर खबरदारी म्हणून जिल्हा परिषदेकडून सध्या ग्रामीण भागात सर्वेक्षण सुरू आहे. विदेश दौरा करून आलेले, शहरीभागातून आलेल्या नागरिकांची माहिती जमा केली जात आहे. याशिवाय खोकला, ताप, सर्दी असलेल्या नागरिकांची माहिती जमा केली जात आहे. आत्तापर्यंत अकरा लाख घरांमध्ये आशा वर्करकडून सर्वेक्षण केले गेले असल्याची माहिती जिल्हा परिषदेचे मुख्य कार्यकारी अधिकारी आयुष प्रसाद यांनी दिली.

जिल्हा परिषदेच्या अंतर्गत असलेल्या शहरालगतच्या गावांमध्ये ‘कोरोना’चा शिरकाव झाला. शहरी भागातील नागरिक ग्रामीण भागात स्थलांतरित होत असल्याने संसर्ग फैलावण्याची शक्यता निर्माण झाली आहे. त्यासाठी जिल्हा परिषद प्रशासनाकडून अधिकाधिक काळजी घेतली जात आहे. याशिवाय जिल्हा परिषदेच्या शाळांमध्ये संस्थात्मक विलगीकरण सुरू करण्यात येणार आहेत, त्यासंदर्भात ग्रामपंचायतींना सूचना देखील दिल्या आहेत. ग्रामपंचायतींना आशा वर्करच्या सर्वेक्षणात मदत करण्याच्या तसेच त्यांना आवश्यकतेनुसार वाहन उपलब्ध करून देण्याच्या सूचना जिल्हा परिषदेकडून दिलेल्या आहेत.