MP Heavy Rainfall : मध्य प्रदेशामध्ये गेल्या दोन दिवसांपासून दमदार पावसाने हजेरी लावली. मुसळधार पावसामुळे 20 हून अधिक जिल्ह्यांमध्ये पुराची स्थिती निर्माण झाली आहे. तर नर्मदा आणि शिप्रा नदीला पूर आला असून त्यांनी धोक्याची पातळी ओलांडली आहे. या महापुरामुळे उज्जैन - इंदूर - बुऱ्हाणपूर - सोलापूर हा महामार्ग मागील 24 तासांपासून बंद ठेवण्यात आला आहे.

मध्यप्रदेशमध्ये सुरु असलेल्या मुसळधार पावसामुळे 20 हून अधिक जिल्ह्यांमध्ये पूर स्थिती निर्माण झाली. अनेक नद्यांनी रौद्ररुप धारण केल्याने नदीकाठच्या गावांना फटका बसला आहे. नर्मदा नदीवरील धरणांचे सात दरवाजे उघडण्यात आले.

ओंकारेश्वरमध्ये धरणाचे 22 दरवाजे उघडण्यात आलेत. त्यामुळे जबलपूर, नरसिंहपुर, रायसेन, नर्मदापुरम, खंडवा जिल्ह्यांतील गावांमध्ये पूरस्थिती निर्माण झाली आहे. मध्य प्रदेशातील आठ जिल्ह्यांना पावसाचा रेड अलर्ट जारी करण्यात आला आहे. तसेच सध्या उज्जैनमधील अनेक मंदिरं आणि घाट पाण्याखाली गेले आहेत.

मोरटक्का येथील नर्मदा नदीच्या पुलापासून केवळ दोन फुटांच्या अंतरावर पाणी आले आहे. त्यामुळे उज्जैन - इंदूर - बुऱ्हाणपूर - सोलापूर महामार्ग मागील 24 तासांपासून बंद आहे. त्यामुळे महाराष्ट्रातील अनेक पर्यटक अडकल्याची भिती निर्माण झाली आहे.