वारणानगर, जि. कोल्हापूर  : वारणा परिसरातील पशूपालकांच्या गोठ्यात जातिवंत आणि अधिक दूध देणाऱ्या गाई तयार होण्यासाठी वारणा दूध संघामार्फत प्रगत देशातील रेतमात्रा आणण्यात येणार आहेत. जातीवंत गाईंच्या पैदाशीसाठी ही महत्वाकांक्षी योजना राबविण्यात येणार असल्याची माहिती वारणा दूध संघाचे अध्यक्ष आमदार डॉ.विनय कोरे यांनी दिली. 

श्री. कोरे पत्रकार परिषदेत बोलत होते. ते म्हणाले, की वारणेच्या कार्यक्षेत्रामध्ये जातिवंत दुधाळ गायींची पैदास वाढविण्यासाठी प्रगत देशातून रेतमात्रा आणण्यात येणार आहेत. यामुळे सध्यापेक्षा अधिक दूध उत्पादन देणाऱ्या गाई पशूपालकांच्या गोठ्यामध्ये तयार होणार आहेत. संघाचे वीस पशूतज्ज्ञ वारणा परिसरातील १०० गावांमध्ये रेतमात्रा योजना राबविणार आहेत. संघातर्फे अल्पदरात पशूपालकांना या रेतमात्रा उपलब्ध करून देण्यात येणार आहेत. 

संघातर्फे येत्या काळात भ्रूण प्रत्यारोपण तंत्रज्ञानाचा अवलंब केला जाणार आहे. यासाठी इस्त्राईल, जर्मनी, हॉलंड या देशांशी करार करण्याची प्रक्रिया सुरु आहे. याचबरोबरीने जातिवंत वासरे संगोपन, देशी जनावरांची पैदास यासारखे उपक्रम यशस्वीपणे राबविले जात आहेत. संघाने २०१६ मध्ये ३० जातिवंत गीर गायी सौराष्ट्र (गुजरात) येथून आणल्या आहेत.

संघाच्या गोठ्यामध्ये देशी गायींच्या पैदाशीचा उपक्रम सुरू आहे. सेंद्रिय शेती, दूध उत्पादनास मोठे महत्व आल्याने संघाने अशा योजनांना प्राधान्य दिले आहे.  यावेळी कार्यकारी संचालक मोहन येडूरकर, अकाऊंट ऑफिसर सुधीर कामेरीकर, पशूवैद्यक विभाग प्रमुख डॉ. एन. एस. वडजे, डॉ.जे.बी. पाटील, डॉ.ओ. पी. कोटगिरे, शेती अधिकारी अशोक पाटील आदी उपस्थित होते.