पुणे  : विदर्भ, मराठवाडा आणि उत्तर महाराष्ट्रात वाढलेले ऊन तापदायक ठरत आहे. मंगळवारी (ता. ५) सकाळपर्यंतच्या २४ तासांमध्ये सलग दुसऱ्या दिवशी अकोला येथे देशातील उच्चांकी ४४.९ अंश सेल्सिअस तापमानाची नोंद झाली. आज (ता.६) विदर्भात उष्णतेच्या लाटेचा इशारा देण्यात आला आहे. उर्वरित राज्यात उन्हाचा चटका कायम राहणार आहे. विदर्भ आणि कोकणात तुरळक ठिकाणी वळीव स्वरूपाचा पाऊस पडण्याचा अंदाजही हवामान विभागाने वर्तविला आहे. 

राज्यात वैशाख वणवा वाढला असून, विदर्भ, मराठवाड्यासह उत्तर महाराष्ट्रात सातत्याने तापमान ४३ अंशांच्या पुढे आहे. परभणी, अकोला, अमरावती, ब्रह्मपुरी, चंद्रपूर, नागपूर, वर्धा येथे कमाल तापमान ४४ अंशापेक्षा अधिक असून, जळगाव, धुळे, मालेगाव, नांदेड, गोंदिया येथे ४३ अंशापेक्षा अधिक तापमान नोंदले जात आहे. पुणे, कोल्हापूर, महाबळेश्‍वर, नाशिक, निफाड, सांगली येथे तापमान चाळीस अंशांच्या खाली आहे. तर कोकणात कमाल तापमानाचा पारा ३३ ते ३४ अंशाच्या दरम्यान आहे. 

विदर्भात सक्रिय असलेला दक्षिणोत्तर कमी दाबाचा पट्टा काहीसा पूर्वेकडे सरकला आहे. विदर्भ आणि कोकणात पावसाला पोषक हवामान आहे. भंडारा, गोंदिया, गडचिरोली, चंद्रपूर तसेच कोकणातील सिंधुदुर्ग जिल्ह्यात हलक्या पावसाची शक्यता वर्तविण्यात आली आहे. बंगालच्या उपसागरात दक्षिण अंदमान समुद्र आणि परिसरावर असलेले कमी दाब क्षेत्र कायम आहे. 

मंगळवारी (ता. ५) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३९.१, जळगाव ४३.५, धुळे ४३.०, कोल्हापूर ३८.५, महाबळेश्‍वर ३२.८, मालेगाव ४३.२, नाशिक ३८.१, निफाड ३९.०, सांगली ३९.७, सोलापूर ४२.७, डहाणू ३३.५, सांताक्रूझ ३४.२, रत्नागिरी ३४.१, औरंगाबाद ४१.५, परभणी ४४.०, नांदेड ४३.५, अकोला ४४.९, अमरावती ४४.४, बुलडाणा ४१.६, ब्रह्मपुरी ४४.८, चंद्रपूर ४४.०, गोंदिया ४३.४, नागपूर ४४.८, वर्धा ४४.५.