नाशिक  : नाशिक बाजार समितीच्या सभापतिपदी काँग्रेसचे माजी जिल्हा परिषद उपाध्यक्ष संपतराव सकाळे यांची बुधवारी (ता. ११) बिनविरोध निवड झाली. श्री. सकाळे यांना संचालकांनी पाठबळ दिल्याने त्यांचे बाजार समितीतील राजकीय वजन सिद्ध झाले असून, माजी सभापती शिवाजी चुंभळे यांना जोरदार धक्का दिला आहे.

शिवसेनेचे बाजार समितीचे सभापती शिवाजी चुंभळे यांना नोकरभरतीत लाच प्रकरणात अटक झाल्यानंतर त्यांचे अधिकार सहकार विभागाने काढले होते. संचालकांनी पत्र दिल्यानंतर हे अधिकार कॉंग्रेसचे संपतराव सकाळे यांच्याकडे आले होते. त्यामुळे चुंभळे आणि सकाळे यांच्यामध्ये मोठा वाद उफाळून आला होता. 

गेल्या तीन महिन्यांनापासून सुरु असलेली राजकीय चढाओढ संपून श्री. सकाळे यांची सरशी झाली आहे. त्यामुळे चुंभळे यात एकाकी पडले. उपविभागीय अधिकारी कुमार आशीर्वाद यांच्या अध्यक्षतेखाली सभापतीपदासाठी निवडणूक झाली. त्यात सभापतीपदासाठी श्री. सकाळे यांचा एकमेव अर्ज दाखल झाला. सर्व पंधरा संचालकांनी त्यांना पाठिंबा दिला. त्यामुळे श्री. सकाळे यांची बिनविरोध निवड झाल्याचे जाहीर करण्यात आले.