मुंबई: ‘कोरोना’च्या पार्श्वभूमीवर जारी करण्यात आलेल्या लॉकडाउन कालावधीत दुधाच्या मागणीत मोठ्या प्रमाणात घट झाल्यामुळे राज्यात अतिरिक्त दुधाचे रूपांतरण दूध भुकटीत करण्याची योजना राबविण्यात येत आहे. या योजनेला दोन महिन्यांची म्हणजेच ३१ ऑक्टोबरपर्यंत मुदतवाढ देण्याचा निर्णय बुधवारी (ता.२६) राज्य मंत्रिमंडळाच्या बैठकीत घेण्यात आला.

राज्यातील दूध दराच्या प्रश्नावर मार्ग काढण्यासाठी राज्य सरकारने या महिन्यात राज्यातील पावणेआठ लाख लहान बालके, गरोदर आणि स्तनदा मातांना पुढील वर्षभर मोफत दूध भुकटी देण्याचा निर्णय यापूर्वीच घेतला आहे. तसेच दररोज दहा लाख लिटर दुधाचे रूपांतरण भुकटीत करण्याच्या योजनेलाही एक महिना म्हणजेच ३१ ऑगस्टपर्यंत मुदतवाढ देण्याचा निर्णय घेतलेला होता.

शासनाने एप्रिल २०२० पासून प्रतिदिन अतिरिक्त ठरणाऱ्या दुधापैकी १० लाख लिटर दुधाचे रूपांतरण दूध भुकटीत करण्याची योजना सुरू केली. सुरुवातीला ही योजना एप्रिल व  मे या दोन महिन्यांसाठी राबविण्यात आली. त्यानंतर या योजनेस वेळोवेळी मुदतवाढ देण्यात आली होती. मात्र राज्यातील अतिरिक्त दुधाची परिस्थिती अद्यापही सुधारलेली नाही. तसेच राज्यात दूध दरवाढीवरून राजकारण अजूनही तापलेले आहे. दुधाच्या दर वाढीसाठी शेतकरी संघटना आणि विरोधी पक्ष अजूनही आक्रमक आहेत. त्यामुळे राज्य मंत्रिमंडळाच्या बैठकीत या योजनेस आता आणखी दोन महिन्यांची मुदतवाढ देण्यात आली आहे.

केंद्र सरकारने कोरोना विषाणूचा प्रादुर्भाव रोखण्यासाठी संपूर्ण देशात २४ मार्चपासून लॉकडाऊन घेाषित केला होता. राज्यानेही १९ मार्चपासून राज्यात लॉकडाऊन लागू केला होता. लॉकडाऊनमध्ये बाजारात पिशवीबंद दुधाच्या मागणीत झालेली घट तसेच हॉटेल, रेस्टॉरंट व मिष्टान्न निर्मिती केंद्रे बंद झाल्यामुळे राज्यातील दैनंदिन दुधाची विक्री सर्वसाधारण १७ लाख लिटरने कमी झाली आहे.