सोलापूर : पुरेशा पावसाअभावी सोलापूर जिल्ह्याची वरदायिनी असलेले उजनी धरण अद्यापही उणे पातळीत आहे. बुधवारी (ता.२१) दुपारपर्यंत धरणात उणे ३.३४ टक्क्यांपर्यंत पाणीपातळी होती. जिल्ह्यातील शेती आणि पिण्याच्या पाणी योजनांचे भवितव्य धरणातील पाण्यावरच अवलंबून असते. परंतु धरणातील पाण्याच्या स्थितीमुळे जिल्ह्यात चिंता वाढली आहे.  धरणाच्या वरच्या बाजूला असलेल्या पुणे जिल्ह्यातच पाऊस कमी झाल्याने उजनी धरण मृतसाठ्यात आहे. तरीही वरच्या धरणांकडून येणारा विसर्ग कायम आहे. सध्या दौंडकडून येणारा विसर्ग ८७९१ क्युसेकवर आहे. या पाण्यामुळेच उणे पातळीत गेलेले धरण हळूहळू भरत आहे. बुधवारी हा पाणीसाठा उणे ३.३४ टक्के होता. गेल्या तीन-चार वर्षांत सलगपणे जुलैच्या महिन्यात धरण जिवंत साठ्यात राहिले आहे. पण यंदा पुरेशा पावसाअभावी ही परिस्थिती निर्माण झाली आहे. यंदा आजअखेर जिल्ह्यात सरासरीच्या १४८ टक्के पाऊस झाला आहे. पण पाणीपातळीत वाढ होईल, असा दमदार पाऊस झाला नसल्याने पाण्याची चिंता वाढली आहे.  असा आहे पाणीसाठा  बुधवारी धरणातील एकूण पाणीपातळी ४९०.७७० मीटरपर्यंत होती. तर एकूण पाणीसाठा ६१.४० टीएमसी इतका होता. त्यापैकी उपयुक्त साठा उणे १.७९ टीएमसी इतका होता. तर पाण्याची टक्केवारी उणे ३.३४ टक्क्यांपर्यंत होती.