नाशिक : देवळा तालुक्यातील वसंतदादा सहकारी साखर कारखाना धाराशिव साखर कारखान्याला भाडेतत्त्वावर दिला आहे. या हंगामात जिल्ह्यासह धुळे, जळगाव, नंदुरबार जिल्ह्यांतील शेतकऱ्यांनी ऊस दिला. मात्र, चार महिन्यांचा कालावधी उलटला, तरीही ऊस उत्पादकांचे पेमेंट मिळाले नाही, त्यामुळे साखर आयुक्तालयाने कारखाना प्रशासनावर कारवाई केली आहे. 

याबाबत कारखान्याचे शेतकी अधिकारी साळुंखे यांनी ऊस उत्पादकांना आपले पेमेंट घेण्यासाठी कारखाना कार्यस्थळावर बोलविले होते. मात्र, कार्यस्थळावर कारखाना प्रशासन व व्यवस्थापन यंत्रणाच उपलब्ध नसल्याने शेतकऱ्यांची मोठी निराशा झाली.  धुळे व जळगाव जिल्ह्यातू शिरपूर, अमळनेर, शबरीधाम येथून आलेले ऊस उत्पादक, ट्रॅक चालक - मालक यांना व्यवस्थापनाच्या निष्काळजीपणामुळे रिकाम्या हाताने परत फिरण्याची वेळ आली. ऊसपुरवठादार शेतकऱ्याची घोर फसवणूक करण्यात आल्याचा आरोप या वेळी शेतकऱ्यांनी केला. इतर कारखान्यापेक्षा १ एक रुपया अधिक दर देऊ, हे आश्वासन खोटे ठरले. 

वसाका कार्यक्षेत्रासह गेटकेनच्या ऊसपुरवठादार शेतकऱ्याची व्यवस्थापनाने घोर फसवणूक केली. नवापूर, शहादा, शिरपूर, चाळीसगाव, पिळखोड, निफाड, आदी ठिकाणांहून ऊस गाळपास आणण्यात आला. कारखाना प्रशासनाच्या मनमानी कारभारामुळे ऊस उत्पादक अडचणीत सापडला आहे.

ऊसपुरवठादार शेतकरी, ऊसतोड कामगार, ऊस वाहतूकदारांकडे व्यवस्थापनाने जाणीवपूर्वक दुर्लक्ष केले आहे. वेळोवेळी संपर्क साधूनही कारखाना प्रशासनाकडून प्रतिसाद मिळाला नाही. पेमेंटबाबत दिलेले धनादेश माघारी घेण्यात आले आहेत. काहींना तर चार महिन्यांत एक रुपयाही मिळाला नाही. 

ऊस उत्पादकांचा सपत्नीक आत्महत्येचा प्रयत्न 

धाराशिव साखर कारखान्याला हंगामात ५५.९३६ टन ऊस दिलेल्या विलास पाटील हे सपत्नीक (रा. जापोरा ता. शिरपूर) शेतकरी पेमेंट घेण्यासाठी आले होते. मात्र, पैसे न मिळाल्याने विषाची बाटली घेऊन वसाकाच्या गेटवर आत्महत्या करण्याचा प्रयत्न त्यांनी केला. या वेळी कुबेर जाधव व प्रहारचे तालुकाध्यक्ष विनोद आहेर यांनी तात्काळ तहसीलदारांना ही माहिती दिली. त्यांनी पेमेंट मिळवून देण्याचे आश्‍वासन दिले. आरआरसी नोटीस कारखाना प्रशासनाला बजावली अाहे, असे देवळ्याचे तहसीलदार शेजुळ यांनी सांगितले.