नगर : पशुधन जगविण्यासाठी छावणीचालकांचे अर्थचक्र कोलमडू नये, पशुधनासाठी योग्य त्या सुविधा मिळाव्या, यासाठी दुसऱ्या टप्प्याकरिता सरकारकडून ८६ कोटी २८ लाख २० हजार रुपये अनुदान जिल्हा प्रशासनाला शनिवारी (ता. १५) प्राप्त झाले. जिल्हाधिकारी राहुल द्विवेदी यांच्या निर्देशानुसार प्रशासनाने आता वाटपाची तयारी युद्धपातळीवर सुरू केली आहे. 

द्विवेदी यांनी जिल्ह्यात ५१३ छावण्यांना मंजुरी दिली. त्यापैकी ५०४ छावण्या सुरू आहेत. त्यात लहान-मोठ्या पशुधनाची संख्या तीन लाख ३३ हजार आहे. प्रशासनाने सतर्कता राखून १५ एप्रिलपर्यंतचा अवधी लक्षात घेऊन, ४६ कोटी ८१ लाख २१ हजार १९९ रुपयांच्या निधीचा अहवाल विभागीय आयुक्तांतर्फे सरकारला सादर केला. चार एप्रिल रोजी या प्रस्तावावर सरकारने मंजुरी दिली. त्यानंतर प्राप्त निधीतून चालक संस्थांना प्रथम ५० टक्के, नंतर २५ टक्के अशी एकूण ७५ टक्के रक्कम देण्यात आली. 

१५ एप्रिलपुढील मुदतीचा विचार करून प्रशासनाने १२७ कोटींची मागणी विभागीय आयुक्तांतर्फे सरकारकडे केली होती. त्यानुसार ८६ कोटी २८ लाख २९ हजार रुपयांचा निधी आला आहे, असे प्रशासनाकडून सांगण्यात आले. थकीत रक्कम मिळाली असल्याने काही प्रमाणात छावणीचालकांना दिलासा मिळाला आहे.