परभणी : ‘‘बिरसा मुंडा कृषी क्रांती योजना आणि डॉ. बाबासाहेब आंबेडकर कृषी स्वावलंबन योजना २०२०-२१ अंतर्गत शेतकऱ्यांसाठी ऑनलाइन अर्ज करण्याची सुविधा उपलब्ध झाली आहे. याचा लाभ घेण्यासाठी शेतकऱ्यांनी महाडीबीटीपीच्या mahadbtmahait.gov.in या संकेतस्थळावर दाखल ऑनलाइन अर्ज करावे’’, असे आवाहन जिल्हा परिषदेच्या कृषी विभागातर्फे करण्यात आले.

बिरसा मुंडा कृषी क्रांती योजना (क्षेत्राबाहेरील) व डॉ. बाबासाहेब आंबेडकर कृषी स्वावलंबन योजनेच्या अंतर्गत नवीन विहीर खोदण्यासाठी २ लाख ५० हजार रुपये, जुनी विहीर दुरुस्तीसाठी ५० हजार रुपये, इनवेल बोरिंगसाठी २० हजार रुपये, विद्युत पंपासाठी २० हजार रुपये, वीज जोडणीसाठी १० हजार रुपये, शेततळे अस्तरीकरणासाठी १ लाख रुपये, सुक्ष्म व ठिबक सिंचनासाठी ५० हजार रुपये किंवा तुषारसाठी २५ हजार आणि परसबागेसाठी ५ हजार रुपये,  तसेच पीव्हीसी व एचडीपीई पाइपसाठी ३० हजार रुपये लाभार्थ्यांच्या थेट बँक खात्यांवर देण्यात येतात. 

या योजनेअंतर्गत नवीन किंवा जुनी विहीर दुरुस्ती व शेततळे प्लास्टिक अस्तरीकरण यापैकी एका योजनेचा पॅकेज स्वरूपात लाभ संबंधितांना देण्यात येतो. त्यासाठी योजनेचा लाभ घेणाऱ्या लाभार्थ्याकडून ऑनलाइन अर्ज मागवून घेतले जातात. विशेष घटक अथवा शासनाच्या कोणत्याही नवीन विहीर व जुनी विहीर दुरुस्ती या योजनेचा लाभ घेतला असेल, त्यांना लाभ मिळत नाही.

ग्रामसभेने शिफारस केलेल्या शेतकऱ्यांनी संकेतस्थळावर अर्ज दाखल करावे. गटविकास अधिकाऱ्यांतर्फे प्रस्तावाची मूळ प्रत आवश्यक त्या कागदपत्रांसह कृषी अधिकारी पंचायत समिती यांच्याकडे सादर करावी. योजनेचा कालावधी नवीन सिंचन विहीर पॅकेजसाठी २ वर्षांचा असून इतर बाबीसाठी १ वर्षाचा आहे. प्रस्ताव सादर केल्याची पोच घ्यावी, असे आवाहन कृषी व पशुसंवर्धन सभापती मीरा टेंगसे, अतिरिक्त मुख्य कार्यकारी अधिकारी विजय मुळीक, कृषी विकास अधिकारी हनुमंत ममदे यांनी केले.