नगर ः नगर जिल्ह्यात गेल्या दोन-तीन दिवसांपासून ढगाळ वातावरण आहे. काही भागात पावसाचा शिडकावाही झाला आहे. त्यामुळे काढणीला आलेल्या कांद्यासह फळे-भाजीपाल्याचे नुकसान होण्याची शेतकऱ्यांना धास्ती आहे. रब्बीत लागवड केलेल्या कांद्याची काढणी करण्याची लगबग जिल्ह्यात सुरु आहे. 

जिल्ह्यात यंदा दीड हेक्टरच्या जवळपास कांद्याची रब्बीत लागवड झाली आहे. त्याची आता बहूतांश भागात काढणी सुरु आहे. कोरोनाची बाधा वाढत असल्याने लॉकडाऊन आहे. त्यामुळे भाजीपाला, फळांचे बाजार समित्यातील लिलाव बंद आहेत. कांदा लिलावही बंद आहेत. त्यामुळे आधीच दर पडलेले असताना आता तीन-चार दिवसांपासून पावसाळी वातावरण तयार झाले आहे. 

नेवासा, नगर, पाथर्डी, श्रीगोंदा, पारनेरच्या काही भागात वादळी वाऱ्यासह पावसाचा शिडकावा झाला. हवामान विभागानेही पावसाचा अंदाज सांगितलेला आहे. त्यामुळे अनेक संकटावर मात करत हाती आलेल्या कांद्यासह अन्य पिकांचे तसेच फळे, भाजीपाल्याचे नुकसान होण्याची शेतकऱ्यांना भीती आहे. कोरोनाच्या पाश्वभूमीवर कांदा काढणी करण्याला सध्या मजुरांचीही वानवा आहे.