जळगाव :  खानदेशात बाजार समित्यांचे कामकाज पूर्ववत झाले आहे. परंतु शेतमालाचे दर मात्र दबावातच आहेत. मध्यंतरी कोविड व बाजारपेठ हवी तशी कार्यरत नव्हते. त्यामुळे शेतमालास दर मिळत नसल्याची बतावणी केली जात होती. परंतु अद्यापही बाजरी, गहू, ज्वारी, मका दरात सुधारणा दिसत नसल्याची स्थिती आहे. 

मक्याची आवक अत्यल्प आहे. त्याचे उत्पादन हवे तसे खानदेशात झालेले नाही. पण मक्याचे दर एप्रिलमध्ये १२५० ते १४००, मे महिन्यात १३०० ते १५५० आणि जूनमध्ये १४०० ते १६५० ते १७८० रुपये प्रतिक्विंटल आहेत. गव्हाचे दरही मार्चपासून १५०० ते १६०० रुपये प्रतिक्विंटल आहेत. ज्वारीचे दर नीचांकी स्थितीत म्हणजेच १३०० ते १४०० रुपये प्रतिक्विंटल आहेत. बाजरीचे दरही १५०० ते १६५० रुपये प्रतिक्विंटल आहेत. 

भुईमूग शेंगांचे दरही मध्यंतरी घसरले होते. किमान दर ३४०० रुपये प्रतिक्विंटल (वाळविलेल्या शेंगा) असे होते. यंदा भुईमुगाच्या शेंगांनाही नीचांकी दर मिळाल्याने शेतकऱ्यांना फटका बसला. कोविडमुळे अडतदार मार्च, एप्रिलमध्ये लिलावात सहभागी होत नव्हते. मे मध्येदेखील बाजार समित्यांचे कामकाज हवे तसे गतिमान नव्हते. परंतु मेच्या अखेरीस कामकाज पूर्ववत झाले. तरीदेखील शेतमालाच्या दरात सुधारणा झालेली नाही. सर्वच शेतमालाचे दर हमीभावापेक्षा कमी आहेत. यामुळे शेतकऱ्यांमध्ये नाराजी आहे. 

शेतीमालाला हमीभाव मिळावा

प्रशासन कोविडचे कारण सांगून बाजार समितीत गर्दी टाळा असे सांगते. पण शेतमालाचे दर कमी आहेत, हमीभाव कुणालाही मिळत नाही, याबाबत प्रशासन कारवाई करीत नाही. या बाबतही शेतकऱ्यांनी नाराजी व्यक्त केली आहे.