नाशिक : नाशिक तालुक्यातील देवळाली कॅम्प येथील विजयनगर भागात करंजकर कुटुंबीयांच्या शेतातील बंद खोलीतून ४८ हजार ६०० रुपये किमतीचे सोयाबीन चोरी गेल्याची घटना घडल्याने शेतकऱ्यांमध्ये भीतीचे वातावरण पसरले आहे.

येथील शेतकरी सोमनाथ गंगाधर कंरजकर यांनी शेतातून चार-पाच दिवसांपूर्वी सोयाबीन काढणी करून सत्तावीस गोण्यांमध्ये भरून मळ्यातील खोलीत शनिवारी (ता. १६) रात्री सात वाजेच्या दरम्यान ठेवली होते. मात्र, रविवारी (ता. १७) सकाळी रोजच्याप्रमाणे मळ्यात गेले असता मळ्यातील खोलीचा दरवाजा चौकटीसह काढलेला दिसला अन् खोलीतील ठेवलेले सोयाबीनच्या सत्तावीस गोण्या अंदाजे ४८ हजार ६०० रुपये किमतीचे सोयाबीन चोरीला गेल्याचे देवळाली कॅम्प पोलिस ठाण्यात देण्यात आली आहे. 

चोरट्यांनी बंद खोलीचा दरवाजा तोडून शेतीमाल लंपास केला आहे. अगोदरच नैसर्गिक आपत्तीमध्ये मोठ्या कष्टाने सोयाबीनचे उत्पादन घेतले. विक्रीसाठी खोलीत सोयाबीन ठेवली असता चोरट्यांनी ही चोरी केली. चोरट्यांचा अद्याप काही सुगावा लागला नाही. याबाबत पुढील तपास सहायक उपनिरीक्षक आर. एस. जाधव करीत आहेत.