सोलापूर : लॉकडाऊन काळातील शेतीचे संपूर्ण वीज बिल माफ करावे, या मागणीसाठी स्वाभिमानी शेतकरी संघटनेने सोलापुरात मंगळवारी (ता.२७) महावितरण मुख्यालयाला टाळे ठोकले. 

ग्राहकांना अव्वाच्या सव्वा वीजबिल देणाऱ्या महावितरणचा यावेळी जोरदार घोषणाबाजी करुन निषेध करण्यात आला. स्वाभिमानी शेतकरी संघटनेचे संस्थापक अध्यक्ष, माजी खासदार  राजू शेट्टी साहेब यांच्या नेतृत्वात राज्यभर वीजबिल माफीसाठी आंदोलन करण्यात आले. त्याचाच भाग म्हणून सोलापुरातही हे आंदोलन झाले. 

‘स्वाभिमानी'चे जिल्हाध्यक्ष महामुद पटेल, तानाजी बागल, युवा जिल्हाध्यक्ष विजय रणदिवे यांच्या नेतृत्वाखाली हे आंदोलन झाले. यावेळी सचिन पाटील, अजित बोरकर, इक्‍बाल मुजावर, रणजित बागल, सदाशिव  वाघमोडे, सचिन मस्के, कांतीलाल नाईकनवरे, तुकाराम शेतसंदी, समाधान काळे, राम शेट्टी आदी उपस्थित होते. 

पटेल म्हणाले, ‘‘सरकारने आमच्या मागण्यांबाबत विचार करावा, शेतकरी आधीच खचला आहे. त्यात पाऊस आणि पूरस्थितीच्या नैसर्गिक आपत्तीने भर टाकली आहे.  त्यामुळे संपूर्ण वीजबिल माफी आवश्‍यक आहे.''  रणदिवे म्हणाले, ‘‘सरकारने वीजबिल माफ केले नाही, तर यापेक्षाही तीव्र आंदोलन करण्यात येईल.’’