कोल्हापूर : गेल्या दोन महिन्यांत साखरेचे दर खाली आल्याने अखेर राज्य सहकारी बॅंकेने पुन्हा मूल्यांकन कमी केले आहे. बुधवारी (ता.४) सायंकाळी साखर मूल्यांकनात १८० रुपयांची कपात केली आहे.  राज्य बॅंकेचे पूर्वीचे साखर मूल्यांकन प्रतिक्विंटल ३१०० रुपये होते, त्यावर ८५ टक्‍क्‍यांप्रमाणे २६३५ रुपये कारखान्यांना मिळत होते, यातून प्रक्रिया, कर्जाचे हप्ते वजा जाता प्रत्यक्ष ऊस बिलासाठी १९०० रुपयेच मिळत होते. आज या मूल्यांकनात राज्य बॅंकेने १८० रुपयांची कपात करून ते प्रतिक्विंटल २९२० पर्यंत कमी केले, त्यामुळे आता कारखान्यांना मूल्यांकनाच्या ८५ टक्के म्हणजे २४८२ रुपये एवढीच उचल मिळेल, त्यातून प्रक्रिया व कर्जाचे हप्ते वजा जाता प्रत्यक्ष उसाला पैसे देता येणार नाहीत, अशी स्थिती बनल्याचे सूत्रांनी सांगितले.  केंद्राने कारखान्यानुसार निर्यात करण्याचा कोटा जाहीर केला आहे. यामुळे ही साखर निर्यात करतानाच क्विंटलमागे ७०० रुपयांचा तोटा सहन करावा लागणार आहे. यातच राज्य बॅंकेने उचलीत कपात केल्याने आता कारखानदारांमध्ये अस्वस्थता पसरली आहे. हंगाम संपल्यानंतर काहीसा निवांतपणा अनुभवणाऱ्या कारखानदारांना राज्य बॅंकेने दणका दिला आहे. यामुळे ज्या कारखान्यांनी अद्याप पहिला हप्ताही ऊस उत्पादकांना दिला नाही, तो हप्ता देण्यास आणखी उशीर होऊ शकतो.  ज्या कारखान्यांनी जाहीर ३००० रुपयांपैकी २५०० रुपयेच अदा केले आहेत, त्या कारखान्यांची उत्पादकांना देय असणारी ५०० रुपयांची शिल्लक रक्कम तातडीने मिळणेसुद्धा धूसर झाल्याने आता या निर्णयामुळे ऊस उत्पादकच भरडला जाण्याची शक्‍यता निर्माण झाली आहे.