नगर : गतवर्षी पावसाने दडी मारल्याने खरीप, रब्बी हंगाम बुडाला. मात्र जिल्ह्यात पूर्वमोसमी पावसामुळे शेतकऱ्यांच्या आशा पल्लवीत झाल्या आहेत.

त्यामुळे पूर्वमशागतीच्या कामांसाठी लगबग सुरू झाली आहे. कृषी विभागही खरीप हंगामासाठी सज्ज झाला आहे. पेरणीसाठी ७० हजार क्विंटल विविध पिकांच्या वाणांची मागणी कृषी विभागाने नोंदवली. यापैकी आजअखेर चाळीस हजार क्विंटल मूग, बाजरी, सोयाबीन, तूर, उडीद आदी वाणांचे बियाणे प्राप्त झाले आहेत. कृषी विभागाला साडेपाच लाख हेक्‍टरवर पेरणी होणे अपेक्षित आहे. गतवर्षी पावसाने हुलकावणी दिल्याने जिल्ह्यात टंचाईचे सावट आहे. चौदा लाख लोकांची तहान भागविण्यासाठी जिल्ह्यात ८४९ टॅंकर धावत आहे. 

जिल्ह्यात ५०४ चारा छावण्या सुरू आहेत. त्यात साडेतीन लाख पशुधन दाखल आहे. मागील चार दिवसांपासून नगर शहरासह जिल्ह्यात बहुतांश ठिकाणी वादळी वाऱ्यासह पावसाचे आगमन झाले. कपाशीसाठी तीन लाख ७५ हजार पाकिटे प्राप्त झाली आहेत. यूरिया, डीएपी आदी रासायनिक खतांकरिता कृषी विभागाने दोन लाख दोन हजार टनांचे मागणी नोंदवली होती. त्यापैकी एक लाख ७० हजार टन रासायनिक खते प्राप्त झाली आहेत.

पीकनिहाय पेरा अपेक्षित (हेक्‍टरमध्ये) भात (१९ हजार), बाजरी (दीड लाख), नागली (एक हजार ९००), तूर (१७ हजार ५००), मूग (४० हजार), उडीद (३५ हजार), सोयाबीन (८५ हजार), भुईमूग (८ हजार), मका (५५ हजार), कापूस (एक लाख ३० हजार).