नांदेड ः नांदेड जिल्ह्यात गुरुवार (ता. १४) पर्यंत २ हजार ६९४ हेक्टरवर (४३. १७) उन्हाळी पिकांची पेरणी झाली आहे. यंदा उन्हाळी ज्वारीसह तृणधान्याचे क्षेत्र वाढले आहे. मात्र, भुईमूग, सूर्यफूल या गळितधान्याच्या क्षेत्रात मोठी घट झाली आहे.

यंदा जिल्ह्यात उद्भभवलेल्या दुष्काळी स्थितीमुळे चारा तसेच अन्नधान्याची संभाव्य टंचाई लक्षात घेऊन सिंचनाची सुविधा असलेल्या शेतकऱ्यांनी उन्हाळी ज्वारीच्या पेरणीला पसंती दिली आहे. जिल्ह्यात एकूण १ हजार १५१ हेक्टरवर ज्वारीची पेरणी झाली आहे. चाऱ्यासाठी मका पिकांची ४८१ हेक्टरवर पेरणी करण्यात आली आहे. जिल्ह्यातील सध्याच्या एकूण उन्हाळी पेरणी क्षेत्रापैकी ६० टक्के क्षेत्रावर चारा पिकांची पेरणी झाली आहे.

जिल्ह्यात यंदा ज्वारी, मका, भात (तांदूळ) या उन्हाळी तृणधान्याची मिळून एकूण १ हजार ७३१ हेक्टरवर पेरणी झाली आहे. भूईमुगाच्या क्षेत्रात मोठी घट झाली आहे. भूईमुगाचे सर्वसाधारण क्षेत्र ४ हजार ८६० हेक्टर असताना यंदा केवळ ५९४ (१२.१२) टक्के क्षेत्रावर पेरणी झाली आहे. सूर्यफुलाचे सर्वसाधारण क्षेत्र १ हजार ३०० हेक्टर असतांना केवळ २८ हेक्टरवर (२.१५ टक्के) पेरणी झाली आहे. उन्हाळी तीळाचे क्षेत्र वाढले असून एकूण ३४१ हेक्टरवर पेरणी झाली आहे.

गळितधान्याचे सर्वसाधारण क्षेत्र ६ हजार १६० हेक्टर असताना प्रत्यक्षात ९६३ हेक्टरवर (१५.६३ टक्के) पेरणी झाली आहे. तालुकानिहाय पेरणी क्षेत्र विचारात घेतले असता यंदा किनवट, नायगांव, लोहा या तीन तालुक्यांत उन्हाळी पिकांची पेरणी वाढली. किनवट तालुक्यात सर्वाधिक १ हजार ४३० हेक्टरवर म्हणजेच जिल्ह्यातील एकूण पेरणी क्षेत्राच्या ५३ टक्के क्षेत्रावर पेरणी झाली आहे. अर्धापूर, मुदखेड, कंधार, माहूर या चार तालुक्यांतील उन्हाळी पेरणी क्षेत्रात घट झाली आहे. नांदेड, देगलूर, मुखेड, बिलोली, धर्माबाद, हदगांव, हिमायनगर, उमरी या आठ तालुक्यांतील उन्हाळी पेरणी अद्याप क्षेत्र निरंक आहे.