मुंबई ः लोकसभा निवडणुकीपासून सुरू असलेली पक्षाची राजकीय पडझड रोखण्यासाठी राष्ट्रवादी काँग्रेसचे सर्वेसर्वा शरद पवार मैदानात उतरले आहेत. पक्षाला लागलेली गळती लक्षात घेऊन निष्ठावान नेते आणि कार्यकर्त्यांना विश्वास देण्यासाठी पवार आज १७ सप्टेंबरपासून राज्याचा दौरा करणार आहेत. त्यांच्या दौऱ्याची सुरवात सोलापूर येथून होईल.

विधानसभेची निवडणूक तोंडावर आली असताना आमदारांसह आता खासदारही पक्ष सोडू लागले आहेत. राष्ट्रवादीचे स्थानिक नेते एकामागोमाग एक बाहेर पडत असल्याने कार्यकर्ते कमालीचे खचले आहेत. या पार्श्वभूमीवर कार्यकर्त्यांचे मनोबल टिकवून ठेवण्यासाठी तसेच पक्ष संघटनेत प्राण फुंकण्यासाठी पवारांनी दौरा आखला आहे. 

या दौऱ्यात पवार हे जिल्हा, तालुक्यातील नेते तसेच कार्यकर्त्यांशी संवाद साधून त्यांना विधानसभा निवडणुकीसाठी सज्ज करणार आहेत. १७ ते २२ सप्टेंबरपर्यंतच्या पहिल्या टप्प्यात पवार हे सोलापूर, उस्मानाबाद, बीड, लातूर, नांदेड, हिंगोली, परभणी, जालना, औरंगाबाद, नगर आणि सातारा या जिल्ह्यांचा दौरा करताना कार्यकर्त्यांसोबत बैठका घेणार आहेत.