सोलापूर ः अकलूजचा सहकारमहर्षी साखर कारखाना जेवढी एफआरपी तेवढी एफआरपी श्री शंकर कारखान्याचीही राहील, अडचण असली, तरी ती आम्ही देऊ, त्यामुळे शेतकऱ्यांनी निश्चित राहावे, असे कारखान्याचे अध्यक्ष आमदार रणजितसिंह मोहिते पाटील यांनी सांगितले.

सदाशिवनगर (ता. माळशिरस) येथील श्री शंकर सहकारी साखर कारखान्याच्या ५१ व्या गळीत हंगामाची सुरुवात बुधवारी (ता. २७) माजी उपमुख्यमंत्री विजयसिंह मोहिते पाटील व सहकारमहर्षी कारखान्याचे अध्यक्ष जयसिंह मोहिते पाटील यांच्या हस्ते झाले. त्यावेळी ते बोलत होते. आमदार राम सातपुते, मदनसिंह मोहिते, अॅड. मिलिंद कुलकर्णी, बाबाराजे देशमुख, धैर्यशील मोहिते, सभापती शोभा साठे आदी उपस्थित होते.

सहकारमहर्षी कारखान्याचे अध्यक्ष जयसिंह मोहिते यांनी शंकर कारखान्याचा यंदाचा गळीत हंगाम बंद झाल्यानंतर महिन्याच्या आत एफआरपी अदा केली जाईल. अकलूजच्या सहकारमहर्षी  कारखान्याची जी एफआरपी निघेल, ती या कारखान्याकडून अदा करण्याचा शब्दही जयसिंह मोहिते पाटील यांनी दिला.