कोल्हापूर : येथील श्री सिद्धगिरी कृषी विज्ञान केंद्राच्या वतीने महाशिवरात्री निमित्त कणेरी मठ येथे सोमवार २८ फेब्रुवारी ते ३ मार्चपर्यंत बचत गट महोत्सवाचे आयोजन करण्यात आले आहे. जिल्ह्यातील बचत गटांना आपले पदार्थ विक्री करण्याची मोठी संधी यानिमित्त मिळाली आहे.  या महोत्सवामध्ये ३५ स्टॉल उभारण्यात येणार असून, सर्व स्टॉल बचत गटांचे असणार आहेत. प्राधान्य क्रमानुसार बचत गटांना महोत्सवातील स्टॉल दिले जाणार आहेत.  कणेरी मठावर प्रत्येक वर्षी महाशिवरात्रीनिमित्त यात्रा भरते. महाराष्ट्रासह कर्नाटकातील हजारो भाविक मठास या निमित्ताने भेट देत असतात. याचा फायदा बचत गटांना व्हावा या हेतूने कृषी विज्ञान केंद्राच्या वतीने महोत्सवाचे आयोजन करण्यात आल्याची माहिती कृषी विज्ञान केंद्राचे प्रमुख रवींद्र सिंह यांनी दिली.  कृषी विज्ञान केंद्राच्या वतीने वर्षभर बचत गटांना प्रोत्साहन दिले जाते. बचत गटाकडील पदार्थ कणेरी मठावरही विक्रीसाठी असतात. या महोत्सवाच्या निमित्ताने बचत गटांना आपली उत्पादने जलद रीतीने विक्री करणे शक्य होणार आहे. बचत गटांनी तातडीने आपला सहभाग नोंदवावा. अधिक माहितीसाठी केंद्रांच्या शास्त्रज्ञ प्रतिभा ठोंबरे यांच्याशी संपर्क साधण्याचे आवाहन कृषी विज्ञान केंद्राच्या वतीने करण्यात आले आहे.