रत्नागिरी ः मुसळधार पावसाचा जोर कमी झाला असून भूस्खलन, दरड कोसळण्याचे प्रकार सुरूच आहे. संगमेश्‍वरमध्ये फुणगूसला डोंगर खाली आला असून, रत्नागिरी तालुक्यात हरचिरी-बौद्धवाडीसह, कोळंबे-वरचीवाडी, तोणदे येथे जमिनीला भेगा गेल्या आहेत. त्यामुळे या परिसरातील घरांना धोका निर्माण झाला आहे. स्थलांतराच्या सूचना जिल्हा प्रशासनाने दिल्या आहेत. येथील ग्रामस्थांना थांटलेला संसार घेऊन नातेवाईकांसह सुरक्षित ठिकाणी आसरा घ्यावा लागणार आहे.

जिल्ह्यात शुक्रवारी (ता. ९) सकाळी ८.३० वाजेपर्यंतच्या चोविस तासांत सरासरी २८.११ मिमी पावसाची नोंद झाली आहे. त्यात मंडणगड २८, दापोली ३४, खेड ३८, गुहागर २०, चिपळूण ३४, संगमेश्‍वर ३१, रत्नागिरी ११, लांजा १९, राजापूर ३८ मिमीची नोंद आहे. गेल्या दोन दिवसांत जिल्हावासीय श्रावणसरींचा अनुभव घेत आहेत; परंतु जुलै महिन्यात सरासरीच्या तुलनेत ११३ टक्के पावसाची नोंद झाली असून, त्याचे परिणाम डोंगरभागांमध्ये वसलेल्या गावांना बसले आहेत. फुणगूस खाडी भागातील थूळवाडी येथे काही दिवसांपूर्वीच जमिनीला भेगा होत्या. 

येथील डोंगर खचण्याच्या स्थितीत आहे. डोंगराच्या पायथ्याशी थुळवाडी आणि गुरववाडी आहे. तेथील २० ते २२ घरांना धोका निर्माण झाला आहे. डोंगर खचू लागल्यामुळे झाडे उन्मळून पडत आहेत. एक झाड घरावर कोसळल्याने पडवी जमीनदोस्त झाली. त्यामुळे स्थलांतर हाच पर्याय येथील ग्रामस्थांपुढे आहे.

पावसामुळे अशीच स्थिती रत्नागिरी तालुक्यातील हरचेरी-बौद्धवाडी येथे निर्माण झाली आहे. जमिनीला मोठ्या भेगा गेल्या असून, तीन घरांना तडे गेले आहेत. या गावात पंधरा कुटुंबे आहेत. त्यांचे तात्पुरते स्थलांतर करण्याच्या सूचना प्रशासनाने दिल्या आहेत. या परिसरातील कोळंबे वरचीवाडी आणि तोणदे परिसरातही भेगा गेल्या असून, एका कुटुंबांचे स्थलांतर करण्यात येणार आहे. रत्नागिरी सुरळीत असली तरीही पश्‍चिम महाराष्ट्रातून येणारा भाजीपाला, दूध, इंधनाचा प्रश्‍न गंभीर झाल्यामुळे तीन दिवस नागरिकांची गैरसोय झाली. शुक्रवारी नागरिकांना दिलासा मिळाला आहे.