मुंबई : कोरोना काळात उपनगरी रेल्वेसेवा सर्वसामान्यांसाठी बंद असताना खासगी वाहनांमधून प्रवास करणे वाढत्या इंधन दरांमुळे जिकिरीचे झाले आहे. महिनाभरापासून इंधन दरात सातत्याने वाढ होत आहे. गेल्या दोन दिवसांत मुंबईत पेट्रोल आणि डिझेल दराने उच्चांक गाठला. पेट्रोलमध्ये ५८, तर डिझेलमध्ये ६४ पैशांनी वाढ झाली.

२६ जानेवारीला इंधनदरात ३३ ते ३४ पैशांनी वाढ झाली. बुधवारीही दरवाढ कायम राहिली. गेल्या महिन्याभरातील ही सहावी दरवाढ आहे. मंगळवारी पेट्रोल दरात ३४, तर डिझेल दरात ३७ पैशांची वाढ झाली; तर बुधवारी पेट्रोलच्या दरात २४, तर डिझेलच्या दरात २७ पैशांनी वाढ झाल्याने पेट्रोलचा प्रतिलिटर दर ९२.८६ रुपये, तर डिझेलचा प्रतिलिटर दर ८३.३० रुपये झाला.

याआधी १८ व १९ जानेवारी रोजी पेट्रोलच्या दरात ४८, तर डिझेल दरात ५३ पैशांची वाढ झाली. २० आणि २१ जानेवारी असे दोन दिवस हे दर स्थिर राहिले. त्यानंतर पुन्हा २२, २३ जानेवारी या दोन दिवसांत पेट्रोल ४८, तर डिझेल ५३ पैशांनी वाढले. दर स्थिर झाल्यानंतर २६ जानेवारीपासून पुन्हा वाढ झाली. आजवरच्या दरवाढीमुळे पेट्रोल १.५४ रुपयांनी महाग झाले, तर डिझेल २.२४ रुपयांनी महाग झाले आहे. बुधवारी राज्यभरात पेट्रोलचा सर्वाधिक ९४.८४ रुपये दर नांदेड जिल्ह्यात, तर डिझेलचा सर्वाधिक ८४.७६ रुपये दर अमरावतीत होता.  

चंडीगडमध्ये सर्वांत स्वस्त इंधन मुंबईतील पेट्रोलचा दर ९२.८६ रुपये आहे. त्याप्रमाणे चेन्नई ९४.३०, दिल्ली ८६.३०, कोलकाता ८७.६९, बेंगळूरु ९४.५०, चंडीगड ८३.९ रुपये; तर डिझेलच्या दरांमध्ये मुंबई ८३.३० रुपये, त्याप्रमाणे चेन्नई ८२.३०, दिल्ली ७६.४८, कोलकाता ८०.८, बंगळूर ८२.००, चंडीगड ७६.२३ रुपये दर होते.