बुलडाणा  : विजेच्या बाबत नागरिकांना अनेक समस्यांचा सामना करावा लागतो. यामध्ये वीजपुरवठा असेल, कमी दाबाचा पुरवठा, जास्त दाबामुळे उपकरणे नादुरुस्त होणे आदी समस्यांचा समावेश आहे. तरी  महावितरण कंपनीने ग्रामीण व शहरी भागातील नागरिकांच्या विजेबाबत भेडसावणाऱ्या समस्या निकाली काढाव्यात, असे निर्देश पालकमंत्री डॉ. राजेंद्र शिंगणे  यांनी दिले . सिंदखेडराजा परिसरातील  विविध गावात महावितरण अंतर्गत वीजपुरवठ्याबाबत डॉ. शिंगणे यांच्या अध्यक्षतेखाली सिंदखेडराजा पंचायत समिती सभागृहात महावितरण अधिकारी-कर्मचारी यांची बैठक आयोजित करण्यात आली. त्याप्रसंगी ते बोलत होते.  बैठकीत विविध गावातील सरपंच, पोलीस पाटील व  शेतकऱ्यांनी आपल्या भागातील विविध समस्या मांडल्या. आढावा बैठकीला तहसीलदार संतोष येवलीकर, कार्यकारी अभियंता श्री. कदम, ॲड. नाझेर काझी,  शिवाजीराजे जाधव, संदीप मेहेत्रे, महावितरणचे अभियंता श्री. माळोदे यांच्यासह महावितरणचे अधिकारी व कर्मचारी उपस्थित होते.