अकोला  ः या भागात गेल्या आठवडाभरापासून सातत्याने मध्यम ते हलक्या स्वरूपातील पाऊस होत असल्याने शेतकरी चिंतेत आहेत. पावसामुळे दिवाळीसारख्या मोठ्या सणावर संकटाचे मोठे सावट आहे.

या भागात सध्या सोयाबीन हंगाम अर्ध्यावर आलेला आहे. काही ठिकाणी ज्वारीची कापणी सुरू झाली. कापसाची वेचणीसुद्धा करण्याची कामे सुरू झाली होती. परंतु, या कालावधीतच मॉन्सूनोत्तर पावसाने आठवडाभरापासून ठाण मांडले आहे. परिणामी, दिवाळी सणाच्या आनंदावर विरजण पाडत आहे. बाजारपेठेत तितकीशी उलाढाल नसल्याचे चित्र आहे.  गेल्या काही वर्षांपासून शेतकरी दुष्काळाने होरपळून निघत आहे. यावर्षी जास्त पावसाने पिकांचे नुकसान झाले आहे. हातातोंडाशी आलेल्या पिकांची दाणादाण होत आहे. यावर्षी हंगामात पहिला महिना सोडला तर नंतरच्या काळात पाऊस नियमित झाला. सर्वच पिके चांगल्या स्थितीत होती. त्यामुळे यंदा उत्पादन वाढून दोन पैसे अधिक मिळतील अशी अपेक्षा शेतकऱ्यांमधून व्यक्त होत होती. मात्र, गेल्या आठवड्यापासून सुरू असलेल्या पावसामुळे पिकांची अवस्था वाईट असल्याचे विदारक चित्र शेतांमध्ये दिसत आहे.

सोंगणी केलेल्या ज्वारीच्या कणसांमधून अक्षरशः कोंब बाहेर फुटले. शेतांमध्ये  लावलेल्या सोयाबीनच्या सुड्या, ज्वारीच्या कणसांचे लावलेले ढिगारे पाण्याखाली आहेत.  गेल्या आठ दिवसांत पावसाने मोठ्या प्रमाणात नुकसान झाले. पिकांसह चाराही खराब झाला. येत्या काळात चाराटंचाईचे संकट अधिक वाढू शकते. शासनाने सर्वत्र पंचनामे करून ओला दुष्काळ जाहीर करावा व शेतकऱ्यांना आर्थिक मदत देण्याची मागणी शेतकरी करीत आहेत.