पुणे ः गेल्या दहा ते बारा दिवसांपासून पुणे जिल्ह्यात पावसाने उघडीप दिली होती. त्यानंतर सोमवारी (ता. ७) झालेल्या पावसाने शिरूर तालुक्याला चांगलेच झोडपले. त्यामुळे पिकांचे नुकसान झाले. दोन ते तीन दिवसांपासून पुणे जिल्ह्याच्या विविध भागात हलका ते मध्यम पाऊस पडत आहे. त्यामुळे पिकांना दिलासा मिळत असला तरी अनेक ठिकाणी वाऱ्यामुळे मूग, उडीद नुकसान झाल्याची स्थिती आहे.

पुणे जिल्ह्यात पावसाचा जोर ओसरल्याने अनेक ठिकाणी कडक उन्हासह सकाळपासून उकाड्यात वाढ झाली होती. त्यामुळे तापमानात चांगलीच वाढ झाली होती. मात्र, मागील दोन ते तीन दिवसांपासून वातावरणात होत असलेल्या बदलामुळे जिल्ह्यात सकाळपासून ऊन पडत असले तरी दुपारनंतर अचानक ढगाळ वातावरण होत आहे. तर चार वाजेनंतर ढग भरून येत असून जोरदार वाऱ्यासह पाऊस पडत आहे.

गेल्या तीन महिन्यांपासून चांगलाच पाऊस झाल्याने धरणातील पाणीसाठ्यात वाढ झाली आहे. सध्या झालेल्या पावसामुळे ओढे, नाले खळाळून वाहत आहेत. त्यामुळे जिल्ह्यातील जवळपास सर्वच धरणात ८० टक्केहून अधिक पाणीसाठा झाला असून काही धरणांतून पाण्याचा विसर्ग सोडण्यात आल्याने नद्या दुथडी भरून वाहत आहेत.

मंगळवारी (ता. ८) सकाळी आठ वाजेपर्यंत शिरूर येथे ३४.५ मिलिमीटर पाऊस झाला. जिल्ह्यातील पश्चिम आणि उत्तरेकडील आठ तालुक्यांत पाऊस पडला आहे. यामध्ये प्रामुख्याने हवेली, भोर, वेल्हा, जुन्नर, खेड, आंबेगाव आणि शिरूर तालुक्याचा समावेश आहे. तर बारामती, इंदापूर, दौंड, मुळशी आणि पुरंदर तालुक्यात उन्हासह काही अंशी ढगाळ वातावरणाची स्थिती होती. हवेलीतील खेड, भोरमधील वेळू, मावळमधील शिवणे, काले, तळेगाव, वेल्ह्यामधील विंझर, आंबावणे, जुन्नरमधील नारायणगाव, खेड मधील चाकण, घोडेगावमधील कळंब, शिरूरमधील न्हावरा, शिरूर परिसरात चांगलाच पाऊस झाला.  

मंगळवारी (ता. ८) सकाळी आठ वाजेपर्यंत झालेला पाऊस, मिलिमीटरमध्ये ः हवेली - खेड २२.८ , भोसरी ६.०, चिंचवड ६.५. भोर - वेळू २०.८, आंबवडे ११.५, निगुडघर १८.५. मावळ - वडगाव मावळ १३.८, तळेगाव २४.३, काले २८.८, कार्ला १९.८, लोणावळा २१.०, शिवणे ३१.३. वेल्हा - वेल्हा २०.५, पाणशेत १४.५, विंझर २४.३, अंबावणे २१.५. जुन्नर - जुन्नर १७.८, नारायणगाव २५.५, वडगाव आनंद १४.८, बेल्हा १९.५, राजूर, डिंगोरे १३.०, आपटाळे १०.३, ओतूर १०. खेड -  वाडा १३.८, राजगुरूनगर १७.३, कुडे १२.८, पाईट १४.०, चाकण २६.०, कन्हेरसर १७.०, कडूस १२.५. आंबेगाव - घोडेगाव १४.०, कळंब ३३.३, पारगाव १५.०, मंचर १२.३. शिरूर - टाकळी १४.८, न्हावरा १९.५, मलठण १६.०, तळेगाव ११.३, रांजणगाव १४.०, कोरेगाव ११.५, पाबळ १३.५, शिरूर ३४.५ पुरंदर - सासवड ११.३.