नाशिक : जिल्ह्यात शनिवारी (ता. २७) दुपारनंतर संततधार सुरू आहे. जिल्ह्याच्या पश्चिम पट्ट्यात सह्याद्री पर्वतरांगांच्या घाटमाथ्यावर गेल्या दोन दिवसांपासून संततधारेमुळे इगतपुरी तालुक्यात दारणा धरण पाणलोट क्षेत्रातील घोटी, इगतपुरी, भावली या परिसरात झालेल्या पावसामुळे धरणांच्या जलसाठ्यात वाढ झाली. त्यामुळे भात लागवडीच्या अवण्यांमध्ये पावसाचे पाणी साचले होते. नाशिक शहर व परिसरात शुक्रवारी (ता. २६) सायंकाळनंतर संततधार सुरू होती. त्यामुळे गंगापूर धारणसाठ्यात वाढ झाल्याचे दिसून आले. गेल्या दोन दिवसांत इगतपुरी व नाशिकमध्ये पावसाने दमदार वापसी केली आहे. त्यामुळे इगतपुरी येथे ८७, तर घोटी येथे ५० मिलिमीटर पावसाची नोंद झाली. या पावसामुळे दारणा धरणात ८३ टक्के, तर भावली धरणात ९७ टक्के जलसाठा झाला आहे. पावसाचे पश्चिम भागात दमदार आगमन होत असले तरी कसमादे, पूर्व भागात पावसाची प्रतीक्षा कायम आहे.  शनिवार (ता. २७) अखेरीस इगतपुरी तालुक्यातील मंडळनिहाय पाऊस मंडळ-पाऊस (मिमी) धारगाव १३२,  टाकेद ३८, वाडी वऱ्हे ५१, नांदगाव ५२, घोटी ४८, इगतपुरी १०५.