नगर : मागेल त्याला शेततळे योजनेतून शेततळ्याची कामे पूर्ण करणाऱ्या २ हजार २४८ शेतकऱ्यांना अनुदानाची प्रतीक्षा आहे. दोन वर्षांपूर्वी हे शेततळी केली आहेत. कृषी विभागाने अनुदानासाठी ११ कोटी १३ लाखांची मागणी केली असल्याची माहिती कृषी विभागातून देण्यात आली.   राज्यात कोरोनाचे संकट आल्याने गेल्या वर्षापासून मागेल त्याला शेततळे योजनेतील कामे बंद आहे. आतापर्यंत नगर जिल्ह्यात १६ हजार ९९३ शेततळ्याची कामे या योजनेतून  पूर्ण झाली आहेत. त्यातील आतापर्यंत १४ हजार ७३३ शेतकऱ्यांना ७२ कोटी ४३ लाख रुपयाचे अनुदान वितरित केले आहे. साधारण २०१९-२०या वर्षात पूर्ण केलेल्या तसेच त्याआधीही काही कामे पूर्ण केलेल्या शेततळ्याचे अनुदान मिळण्याची अजूनही शेतकऱ्यांना प्रतीक्षा असून, नगर जिल्ह्यामध्ये असे २ हजार २४८ शेतकरी आहेत. त्यासाठी साधारण ११ कोटी १३ लाखाची गरज असून, तेवढी मागणी केली असल्याचे कृषी विभागातून सांगितले जात आहे.   तालुकानिहाय शेततळी कृषी विभागाने दिलेल्या माहितीनुसार नगर तालुक्यात ५४, पारनेर तालुक्यात ८०, पाथर्डी तालुक्यात १४५, जामखेड तालुक्यात ३१, श्रीगोंदा तालुक्यात ९२४, कर्जत तालुक्यात ४०५. नेवासा तालुक्यात १३०, श्रीरामपूर २०, शेवगाव ८०, राहुरी ५५, संगमनेर तालुक्यात ९२, राहाता तालुक्यात ९९, कोपरगाव तालुक्यात ४९, अकोले तालुक्यात ८४ शेतकऱ्यांना अनुदान देणे बाकी आहे.