पुणे : राज्यात होत असलेल्या ढगाळ हवामानामुळे किमान तापमानात वाढ झाली आहे. पहाटे गारठा जाणवत असला तरी कडाक्याच्या थंडीसाठी वाट पाहावी लागणार आहे. आज (ता. ११) राज्यात मुख्यतः कोरड्या हवामानाचा अंदाज आहे. तसेच तापमानातही चढ-उतार होण्याची शक्यता हवामान विभागाने वर्तविली आहे.

वायव्य आणि उत्तर भारतातील राज्यात थंडी वाढत आहे. राजस्थानाच्या चुरू येथे शुक्रवारी (ता. १०) देशाच्या सपाट भूभागावरील सर्वांत नीचांकी ४.३ अंश सेल्सिअस तापमानाची नोंद झाली. राज्याच्या काही भागांत अंशतः ढगाळ हवामान होत आहे. दुपारच्या वेळी उन्हाचा चटकाही वाढला आहे.  

राज्याच्या कमाल तापमानाचा पारा वाढला असून, कोकण, मराठवाडा आणि विदर्भात कमाल तापमान ३० अंशांच्या पुढे आहे. तर राज्यात बहुतांशी ठिकाणी किमान तापमान १५ अंशांच्या पुढे गेले आहे. शुक्रवारी (ता. १०) सकाळपर्यंतच्या २४ तासांमध्ये रत्नागिरी येथे उच्चांकी ३४.८ अंश सेल्सिअस तापमान नोंदले गेले. महाबळेश्‍वर येथे नीचांकी १४.८ अंश सेल्सिअस तापमानाची नोंद झाली.

शुक्रवारी (ता. १०) सकाळपर्यंतच्या २४ तासांमध्ये राज्यात विविध ठिकाणी नोंदले गेलेले कमाल तापमान, कंसात किमान तापमान (अंश सेल्सिअसमध्ये) पुणे २८.८ (१५.१), नगर - (१८.३), जळगाव २९.६ (१६), कोल्हापूर २९.५ (१९.३), महाबळेश्‍वर २३.३ (१४.८), मालेगाव २६.६ (१७.४), नाशिक २८.६ (१५.१), निफाड २८.५ (१५), सांगली २९.७ (१८.३), सातारा २९.१(१६.९), सोलापूर ३१.५ (१८.६), सांताक्रूझ ३३.२ (२२.२), अलिबाग ३१.४ (-), डहाणू २९.१ (१९.६), रत्नागिरी ३४.८ (२१.६), औरंगाबाद २८.७ (१७), नांदेड ३१.२ (१८), परभणी ३१ (१५.८), अकोला ३१.८ (१८.५), अमरावती ३१ (१५.३), बुलडाणा ३० (१७.७), चंद्रपूर ३०.८ (१८.४), गडचिरोली ३१ (१७.२), गोंदिया २९.५ (१५.४), नागपूर ३०.६ (१६.४), वर्धा ३०.२ (१६.८), वाशीम ३२ (१६), यवतमाळ ३० (१५).