नागपूर  : बुधवारपासून (ता. ४) सुरू होणाऱ्या राज्य विधिमंडळाच्या पावसाळी अधिवेशनात राज्य सरकारला घेरण्यासाठी विरोधकांनी आयुधे परजली असून केवळ तीन आठवडे चालणाऱ्या या अधिवेशनासाठी १५ हजारांवर तारांकित प्रश्‍न व अडीच हजारावर लक्षवेधी सूचना विधिमंडळ सचिवालयाकडे दिल्या आहेत.

विधीमंडळाच्या पावसाळी अधिवेशनासाठी विभागाला विधानसभा आणि विधान परिषदेच्या सदस्यांकडून एकूण अडीच हजारावर लक्षवेधी सूचना प्राप्त झाल्या आहेत. सर्वाधिक लक्षवेधी सूचना या विधानसभेच्या सदस्यांकडून सादर झाल्या आहेत.

विधिमंडळाच्या चार जुलैपासून उपराजधानीत सुरू होणाऱ्या पावसाळी अधिवेशनासाठी २७ जूनपासून लक्षवेधी सूचना स्विकारण्याला सुरवात झाली. विधानसभा व विधान परिषदेच्या सदस्यांकडून अशा एकूण अडीच हजारावर लक्षवेधी सूचना संबंधित खात्याला सादर झाल्या आहेत. ही संख्या पुढे आणखी वाढण्याची शक्‍यता आहे.

तातडीच्या जनहिताच्या मुद्याकडे शासनाचे लक्ष वेधण्यासाठी लक्षवेधी सूचना विधानसभा आणि विधान परिषदेच्या सदस्यांना त्यांच्या सभागृहात मांडता येतात. विधानसभा व विधान परिषद सदस्यांनी जवळपास १५ हजारांवर तारांकित प्रश्‍न दिले आहेत. विधिमंडळ कामकाज समितीने आखलेल्या कामकाजानुसार विधिमंडळाच्या केवळ १३ बैठका होणार आहे. शेतकऱ्यांच्या आत्महत्या, शेतकऱ्यांची कर्जमाफी, नागपुरातील कायदा व सुव्यवस्था या प्रश्‍नांवर विरोधक आक्रमक राहण्याची शक्‍यता आहे. या काळात या प्रश्‍नांपैकी किती प्रश्‍नांची तड लागेल, हे काही दिवसांतच स्पष्ट होणार आहे.