सिंधुदुर्ग : ‘‘काजूवरील व्हॅट कमी केल्याचा फायदा परदेशातील काजूला झाला आहे, मात्र येथील शेतकरी संकटात सापडला आहे. चांगला दर मिळविण्यासाठी आपला ब्रँड तयार होणे आवश्यक आहे. त्यामुळे सर्व काजू उत्पादक शेतकऱ्यांनी जीआय मानांकनासाठी संघटित व्हावे,’’ असे आवाहन प्रा. गणेश हिंगमिरे यांनी येथे केले.

सावंतवाडी मळगाव येथे सिंधुदुर्ग जिल्हा बँक, भगीरथ प्रतिष्ठान आणि कृषी उत्पन्न बाजार समितीच्या वतीने ‘काजू बी’ जीआय मानांकन कार्यशाळेचे आयोजन करण्यात आले होते. या कार्यशाळेला जिल्हा बँकेचे अध्यक्ष सतीश सांवत, संचालक व्हिक्टर डॉन्टस, प्रमोद कामत, प्रमोद धुरी, गुरुनाथ पेडणेकर, गजानन गावडे, डॉ. प्रसाद देवधर, विद्याधर बांदेकर, सुधाकर नेररकर, एकनाथ नाडकर्णी, मनीष दळवी उपस्थित होते.

 हिंगमिरे म्हणाले, ‘‘केरळमधील काजूला जीआय मानांकन असल्यामुळे तेथील काजूची मोठ्या प्रमाणात निर्यात होते. सिंधुदुर्ग जिल्ह्यात काजू उत्पादनातून १२०० ते १३०० कोटींची उलाढाल होते. मात्र असे असले तरी येथील शेतकरी जीआय मानांकनाबाबत अनभिज्ञ आहे. त्यामुळे भविष्यात येथील काजू उत्पादक शेतकऱ्यांनी संघटित होणे आवश्‍यक आहे. उत्पादक शेतकऱ्यांनी एकत्रितपणे येणाऱ्या संकटाचा सामना केला तरच तो सावरू शकेल.’’

काजूसाठी बँक योजना राबविणार

काजू उत्पादनातून येथील शेतकऱ्यांला आर्थिक स्थैर्य प्राप्त होऊ शकते हे स्पष्ट झाले आहे. त्यामुळे काजू बागायतदारास जिल्हा बँक प्रति झाड ६०० रुपये, तर जीआय मानांकन झाडास ७०० रुपये याप्रमाणे कर्ज देणार आहे. बँकेमार्फत ही स्वतंत्र योजना राबविली जाणार असल्याची माहिती बँकेंचे अध्यक्ष सतीश सावंत यांनी दिली.