आळेफाटा, जि. पुणे : पुणे-नाशिक हायस्पीड रेल्वेसाठी एक इंचही जमीन देणार नाही, असा इशारा पुणे जिल्हा रेल्वे कृती समितीचे जिल्हाध्यक्ष नीलेश भुजबळ यांनी दिला. आळेफाटा येथे सोमवारी (ता.२) केलेल्या रास्ता रोको आंदोलन करण्यात आले.  या वेळी पुणे जिल्हा परिषदेचे माजी सदस्य माऊली कुऱ्हाडे, प्रसन्न डोके, खेड पंचायत समितीचे माजी सभापती पाटील बुवा गवारी, जुन्नर तालुका शेतकरी संघटनेचे अध्यक्ष अंबादास हांडे, पंचायत समितीचे सदस्य जीवन शिंदे, भाऊसाहेब कुऱ्हाडे, प्रीतम काळे, विजय कुऱ्हाडे, नवनाथ निमसे, दिनेश सहाणे, उदय पाटील, संजय कुऱ्हाडे, शरद गाढवे, गणेश गुंजाळ, अनिल वाघोले सुंदर कुऱ्हाडे, मिननाथ शिंदे आदी मान्यवर व शेतकरी उपस्थित होते. हायस्पीड रेल्वे जुन्नर, आंबेगाव, खेड, हवेली या तालुक्यातून जात असून अनेक शेतकऱ्यांच्या बागायती शेत जमिनींचे अधिग्रहण केले जात आहे. महारेलने मोजणीची प्रक्रिया कुठलीही माहिती न देता मोजणी सुरू केली आहे. या बाबत शेतकऱ्यांना जमिनीचा मोबदला किती मिळणार, या बाबत कोणतीही पूर्वकल्पना दिलेली नाही. तसेच या रेल्वे ज्या ठिकाणाहून जात आहे, त्यामध्ये अनेक शेतकऱ्यांच्या विहिरी जात आहेत. उर्वरित क्षेत्राला पाणीपुरवठा कुठून करायचा हा त्यांच्यापुढे मोठा प्रश्न उभा राहिला आहे. अनेक शेतकऱ्यांनी उपसा सिंचन योजनेच्या पाइपलाइन आहेत, या बाबत महारेलने कोणताही निर्णय जाहीर केलेला नाही. अनेक प्रकल्पांना या पूर्वी आमच्या जमिनींचे संपादन झाले असल्याने रेल्वे प्रकल्पाला आम्ही जमिनी देणार नसल्याची ठाम भूमिका घेतली.