सोलापूर : कधी अस्मानी, तर कधी प्रशासकीय संकटाचा सामना शेतकऱ्यांना करावा लागत आहे. पंतप्रधान पीक विमा योजनेत २०१८ मध्ये कांदा पिकासाठी विमा काढलेल्या शेतकऱ्यांना अद्यापही न्यायाची प्रतीक्षा कायम आहे.

माढा तालुक्‍यातील अंजनगाव, भोसरे, अकोले, उपळवटे, चौभे पिंपरी या गावातील शेतकऱ्यांनी जिल्हाधिकाऱ्यांकडे याबाबतची तक्रार केली आहे. या तक्रारीवर सुनावणी केव्हा होणार? आणि न्याय केव्हा मिळणार याकडे, त्यांचे लक्ष लागले आहे.

या योजनेसाठी नियुक्त विमा कंपनी बजाज अलायन्स जनरल इन्शुरन्स आणि महसूल कर्मचाऱ्यांनी पीक कापणीचे बोगस रेकॉर्ड तयार केल्याचा आरोप शेतकऱ्यांनी केला. याबाबतच्या तक्रारीवर माढा तहसीलदार यांच्याकडे सुनावणी झाली. त्यानंतर जिल्हाधिकाऱ्यांकडे याबाबतची तक्रार करण्यात आली आहे. 

तत्कालीन जिल्हाधिकारी डॉ. राजेंद्र भोसले, नूतन जिल्हाधिकारी मिलिंद शंभरकर यांच्या बदली प्रक्रियेत शेतकऱ्यांचा हा विषय प्रशासनाच्या विस्मरणातून गेला की काय? अशी शंका शेतकऱ्यांना येऊ लागली आहे. विम्यापासून वंचित ठेवणाऱ्या कर्मचाऱ्यांवर कारवाई करावी व शेतकऱ्यांना विम्याची रक्कम मिळवून द्यावी, अशी मागणी ॲड. धनंजय चव्हाण यांनी केली.