नागपूर : खरीप कर्जाचे वाटप शनिवार (ता. १५) पर्यंत करण्याचे शासनाचे निर्देश आहेत. मात्र, त्यानंतरही भारतीय स्टेट बँकेच्या जलालखेडा शाखेकडून गेल्या दोन महिन्यांपासून दीडशे शेतकऱ्यांना कर्जासाठी ताटकळत ठेवण्याचा धक्कादायक प्रकार समोर आला आहे.

नरखेड तालुक्यातील जलालखेडा येथे भारतीय स्टेट बँकेची शाखा आहे. या शाखेत पीक कर्जासाठी ४८९ शेतकऱ्यांनी अर्ज केले होते. यातील ३३९ शेतकऱ्यांना पीक कर्ज घेण्यात आले. उर्वरित दिवशी शेतकऱ्यांना मात्र बँकेकडून कर्ज देण्यास टाळाटाळ केली जात असल्याचा आरोप आहे.

विशेष म्हणजे या सर्व शेतकऱ्यांनी दोन ते अडीच महिन्यांत पूर्वीचा आवश्यक कागदपत्रांची पूर्तता केली होती. मात्र, त्यानंतरही वेळेवर कर्ज उपलब्ध न झाल्याने शेतकऱ्यांना खरीप पिकांच्या लागवडीसाठी उसनवारी करावी लागली. त्यानंतर कर्ज मिळण्याच्या अपेक्षेने शेतकरी शेतीची कामे सोडून रोज बँकेत हजेरी लावत आहेत. परंतु बँक कर्मचाऱ्यांकडून पीक कर्ज तर दूरच साधी सौजन्याची वागणूक देखील मिळत नसल्याचा आरोपही शेतकऱ्यांनी केला आहे. ‘‘तुम्हाला बोलावले का, अजून वेळ लागेल, बँकेतून फोन आला का’’, अशी उत्तरे बँक कर्मचारी देत असल्याचे शेतकऱ्यांचे म्हणणे आहे. या सर्व प्रकाराबाबत स्थानिक लोकप्रतिनिधींना माहिती आहे. त्यांच्याकडून देखील या संबंधाने हस्तक्षेप नसल्याने शेतकऱ्यांमध्ये रोष निर्माण झाला आहे.

साडेतीन कोटींचे पीककर्ज भारतीय स्टेट बँकेच्या जलालखेडा शाखेला ४८९ पीककर्ज अर्ज प्राप्त झाले होते. यातील ३३९ शेतकऱ्यांना तीन कोटी ३१ लाख ४१ हजार ३०० रुपयांची कर्ज वितरित करण्यात आले, अशी माहिती बँकेच्या सूत्रांनी दिली.