शहादा, जि. नंदुरबार : आयकर भरत असूनही केंद्र शासनाच्या पंतप्रधान शेतकरी सन्मान योजनेचे अनुदान घेणाऱ्या तालुक्यातील ६५१ शेतकऱ्यांना तहसीलदार कार्यालयाने घेतलेले अनुदान परत करण्यासंबंधी नोटिसा बजावल्या आहेत. या शेतकऱ्यांनी आत्तापर्यंत ६ कोटी १५ लाख आठ हजार अनुदान घेतल्याचे समजते.

देशातील शेतकऱ्यांना आर्थिक मदत व्हावी, यासाठी केंद्र सरकारने पंतप्रधान शेतकरी सन्मान योजना सुरू केली. यात शेतकऱ्यांना वर्षाला सहा हजार रुपये देण्यात येतात. योजनेच्या निकषाप्रमाणे आयकर भरणाऱ्या व्यक्ती या योजनेस पात्र नाहीत. केंद्र शासनाने पात्र लाभार्थ्यांपैकी आयकर भरणाऱ्या लाभार्थ्यांची यादी येथील तहसील प्रशासनास प्राप्त झाली आहे. या यादीत नाव असलेली शेतकरी योजनेत पात्र नाहीत. शेतकऱ्यांनी घेतलेल्या रकमा परत करण्याविषयी गावोगावच्या तलाठ्यांना अपात्र शेतकऱ्यांची यादी देण्यात आली आहे. तलाठ्यांकडून अपात्र शेतकऱ्यांना वसुलीच्या नोटिसा बजावण्यात येत आहे. धनादेशाद्वारे तहसील कार्यालयात या रकमा जमा कराव्यात, अशी सूचना मिळाल्याचे शेतकऱ्यांनी सांगितले.

केंद्र शासनाच्या पंतप्रधान शेतकरी सन्मान योजनेच्या निकषात बसत नसतानाही ज्या लाभार्थ्यांना मानधन दिले, त्यांची नावे तहसील कार्यालयास प्राप्त झाली आहेत. तलाठ्यांमार्फत या रक्कमेची वसुली सुरू आहे. संबंधितांना वसुलीच्या नोटिसा बजावल्या जात आहेत. अपात्र लाभार्थ्यांनी रक्कमेचा परतावा करावा. अन्यथा प्रचलित कायद्यान्वये कारवाई करण्यात येईल. - डॉ. मिलिंद कुलकर्णी, तहसीलदार, शहादा, जि. नंदुरबार