नाशिक : ‘‘कोरोनाच्या पार्श्वभूमीवर प्रत्येकाने प्रतिकारशक्ती वाढविणे गरजेचे आहे. यासाठी दैनंदिन आहार हा संतुलित असावा, या साठी महिलांनी स्वतः: च्या  व आपल्या कुटुंबाच्या पौष्टिक आहाराकडे नीट लक्ष द्यावे. सेंद्रिय पद्धतीने घरगुती परसबाग उभारून कुटुंबाची गरज भागवावी,’’ असे आवाहन मालेगाव कृषी विज्ञान केंद्राचे प्रमुख अमित पाटील यांनी केले. 

केंद्र सरकारच्या शेतकरी कल्याण व कृषी मंत्रालय यांचे सूचनांप्रमाणे कृषी विज्ञान केंद्र मालेगावतर्फे  राष्ट्रीय पोषण अभियान व वृक्षारोपण कार्यक्रमाचे कृषी महाविद्यालय मालेगाव येथे नुकतेच करण्यात आले. पंचायत समिती सभापती सुवर्णा देसाई  यांच्या हस्ते करण्यात आले. विशेष अतिथी म्हणून कृषी महाविद्यालयाचे प्राचार्य प्रकाश तुरबतमठ उपस्थित होते. 

तांत्रिक सत्रात  विषय विशेषज्ञ (उद्यानविद्या) पवन चौधरी यांनी ‘उपस्थितांना पोषणमूल्य आधारित परसबाग’ या विषयावर मार्गदर्शन केले. यात त्यांनी विविध पालेभाज्या, फळे यातील पोषण मूल्यांबाबत माहिती दिली. परसबाग लागवडीच्या विविध पद्धती, जसे गंगा-मा-मंडल सारख्या पद्धती विशद केल्या. विषय विशेषज्ञ (कृषिविद्या) रूपेश खेडकर यांनी भारतीय कृषी संशोधन परिषदेतर्फे संशोधित विविध पिकांच्या बायोफ़ोर्टिफाइड वाणांबाबत माहिती दिली.