जळगाव : जिल्ह्यातील चोपडा, रावेर, जळगाव आणि चाळीसगाव येथील बाजार समितीमध्ये मक्‍याची आवक घटली असून, दरात सुधारणा झाली आहे.  जळगाव बाजार समितीत मागील आठवड्यातच आवक निम्म्यावर आली आहे. या बाजारात प्रतिदिन ४०० क्विंटलपर्यंत आवक होत आहे. चाळीसगाव बाजार समितीत प्रतिदिन १८०० क्विंटलपर्यंत आवक आहे; तर रावेर व चोपडा बाजार समितीत मागील पंधरवड्यात प्रतिदिन ११०० क्विंटल आवक झाली. आवक कमी होत असतानाच दरात सुधारणा होत आहे. या महिन्याच्या सुरवातीला महिनाभर उधारीने १२०० रुपये प्रतिक्विंटल या दरात बाजार समित्यांमध्ये मक्‍याची खरेदी केली जात होती. मका विक्रीनंतर लागलीच रोकड हवी असेल, तर १०७५ रुपये प्रतिक्विंटलचे दर दिले जात होते; परंतु जिल्ह्यात रब्बी हंगामात मक्‍याची पेरणी किंवा लागवड कमी झाली होती. रावेर, यावल भागात हरभऱ्याची पेरणी अधिक होती. पेरणी फक्त चोपडा, जळगाव, पाचोरा, मुक्ताईनगर भागात बऱ्यापैकी झाली होती. मकामळणी फेब्रुवारीतच अनेक ठिकाणी सुरू झाली. सुरवातीलाही कमी दर होते. मार्चअखेरपर्यंत कमाल मका उत्पादकांनी मळणी करून मका बाजारात विक्रीसाठी आणला. त्यामुळे प्रमुख बाजार समित्यांमध्ये मक्‍याची आवक घटली आहे. पुढील आठ १० दिवसांत आवक आणखी कमी होईल. मका उपलब्ध होत नसल्याने अनेक व्यापारी थेट गावांमध्ये जाऊन मक्‍याची खेडा खरेदी करीत आहेत. ही खरेदी आणखी १० ते १२ दिवस सुरू राहील. यानंतर आवक जवळपास शून्यावर राहील, असे व्यापारी व शेतकऱ्यांचे म्हणणे आहे.