नागपूर : राज्यातील शेतकऱ्यांच्या खात्यात २५ नोव्हेंबरपर्यंत कर्जमाफीची रक्‍कम जमा होईल, अशी घोषणा खुद्द मुख्यमंत्र्यांनी केली होती. परंतु ही डेडलाइनदेखील पाळल्या गेली नसल्याने शेतकऱ्यांमध्ये अस्वस्थता पसरली आहे.

१० नोव्हेंबर रोजी नागपुरात आयोजित ॲग्रोव्हिजन कृषी प्रदर्शनाच्या उद्‍घाटन सोहळ्यात मुख्यमंत्री देवेंद्र फडणवीस यांनी उपराष्ट्रपती वेंकय्या नायडू यांच्या उपस्थितीत २५ नोव्हेंबरपर्यंत सर्व पात्र शेतकऱ्यांच्या खात्यात कर्जमाफीची रक्‍कम जमा होईल, अशी घोषणा केली. परंतु २५ नोव्हेंबरची डेडलाइन उलटूनदेखील कर्जमाफीचे चित्र स्पष्ट झालेले नाही आणि रक्कमही जमा झाली नसल्याचे शेतकऱ्यांचे म्हणणे आहे. बॅंकांनी रब्बीकरीताचे कर्जही दिले नसल्याच्या शेतकऱ्यांच्या तक्रारी आहेत.