मुंबई : महावितरणच्या भोंगळ, नियोजनशून्य कारभारामुळे राज्यावर भारनियमनाचे संकट उद्भवले आहे. २५०० मेगावॉट विजेचा तुटवडा असताना ५००० मेगावॉट विजेचा तुटवडा असल्याचे सांगून ग्रामीण महाराष्ट्राची फसवणूक केली जात आहे, अशी माहिती महाराष्ट्र राज्य वीजग्राहक संघटनेचे अध्यक्ष प्रताप होगाडे यांनी दिली.

श्री. होगाडे म्हणाले, की जनतेच्या वाढत्या रोषानंतर महावितरणच्या अ आणि ब ग्राहक श्रेणीतील भारनियमन टप्प्याटप्प्याने मागे घेण्यात आले आहे. त्यामुळे मुंबई उपनगर, ठाणे, नवी मुंबईतील वीजग्राहकांना थोडासा दिलासा मिळाला. पण उर्वरित क ते जी ३ या ग्राहक श्रेणीतील सर्व भारनियमन मागे घेतले पाहिजे. वास्तविक विजेचा तुटवडा २५०० मेगावॉट आहे.

त्यानुसार मंजूर भारनियमन न करता महावितरण मनमानी पद्धतीने भारनियमन करत असल्याचे त्यांनी सांगितले. उन्हाळ्यात १९००० मेगावॉट वीज देणाऱ्या महावितरणला पावसाळ्यात १५४०० मेगावॉट वीजही देता येत नाही. त्यामुळे महावितरणाच्या बेकायदा भारनियमनाला आव्हान देणारी याचिका दाखल करणार आहे, अशी माहिती महाराष्ट्र राज्य वीजग्राहक संघटनेचे अध्यक्ष प्रताप होगाडे यांनी दिली.

नियोजनाअभावी बट्ट्याबोळ पुरेशा वीजपुरवठ्यासाठी एकतर बंद ठेवलेले प्रकल्प सुरू करून पुरेशी वीज उपलब्ध करून दिली पाहिजे. विलंब लागत असेल तर बाजारातून अथवा खासगी पुरवठादारांकडून अल्प मुदतीने वीज खरेदी करून ग्राहकांना दिली पाहिजे. दरवर्षी सणासुदीच्या काळात विजेची मागणी वाढते हे जगजाहीर आहे. तरीही ग्राहकांना पुरेशी वीज देता येत नाही. विजेचा बट्ट्याबोळ हा केवळ योग्य नियोजनाअभावी सुरू असल्याचे त्यांनी सांगितले.