औरंगाबाद : जिल्ह्यातील १६ मंडळांत गुरुवारी (ता. २५) सकाळपर्यंतच्या चोवीस तासांत पावसाची हजेरी लागली. सिद्धनाथ वडगाव मंडळातील ४२ मिलिमीटर पावसाची नोंद वगळता इतर मंडळांत तुरळक, हलक्या ते मध्यम स्वरूपाचा पाऊस झाला. 

औरंगाबाद तालुक्यांतर्गत येत असलेल्या करमाड मंडळात १४ मिलिमीटर, वैजापूर तालुक्‍यातील वैजापूर मंडळात १९, शिवूर १७, तर लासूरगाव मंडळात १९ मिलिमीटर इतका पाऊस झाला. उर्वरित मंडळात १ ते १० मिलिमीटरदरम्यान पाऊस झाला. सिद्धनाथ वडगाव मंडळात सर्वाधिक ४२ मिलिमीटर पावसाची नोंद झाली. याच मंडळातील काही गावशिवारात सडा पडल्यागत पाऊस झाला. 

शेकटा गाव शिवारात ३३ मिलिमीटर पावसाची नोंद झाली. वजनापूर व शेकटा गावशिवारातील आठ बंधाऱ्यांपैकी एकाच बंधाऱ्याला पाणी आले. त्यामुळे इतर बंधाऱ्यांच्या शिवारात पावसाचे प्रमाण कमी होते, हे स्पष्ट होते. बीड, उस्मानाबाद जिल्ह्यातील मोजक्‍या मंडळांत पावसाच्या तुरळक सरी कोसळल्या.

ढग इकडे... विमान तिकडे...

ढग येतात पण पाऊस पडत नाही. अशा स्थितीत कृत्रिम पाऊस पाडण्याचा प्रयोग करण्यासाठी शासन तयार असल्याचे सांगितले गेले. त्यात तारखाही समोर आल्या. परंतु प्रत्यक्षात पावसाची वाट पाहणेच उचित समजल्याचे चित्र आहे. कृत्रिम पाऊस पाडण्यासाठी सोलापूर विमानतळावर विमान उतरले; पण तिकडे ढगच नाहीत. दुसरीकडे औरंगाबादसह मराठवाड्यातील काही भागांत अधूनमधून ढग दिसत आहेत. तरीही इकडे कृत्रिम पाऊस पाडण्यासाठीची तयारी नाही. गुरुवारी (ता. २५) औरंगाबाद शहराच्या कक्षेत आकाशात ढगांची गर्दी होती. दुसरीकडे परभणीतही ढग दिसले. परंतु पावसाची वाट पाहण्याशिवाय सध्यातरी पर्याय दिसत नाही.