अकोला  ः पुढील महिन्यात रंगपंचमीचा उत्सव जवळ आला आहे. या उत्सवासाठी वापरले जाणारे रंग नैसर्गिकरीत्या बनविण्यासाठी सिसा उदेगाव (जि. अकोला) येथील कृषी विज्ञान केंद्राच्या प्रक्षेत्रावर प्रात्यक्षिक व प्रशिक्षण देण्यात आले. सध्या होळीसाठी रंग म्हटला, की बाजारातील विविध रंगाचे रंग डोळ्यासमोर येतात. पण ते रासायनिक रंग शरीरासाठी हानिकारक असतात.  तरीही त्या रंगाचा अतोनात उपयोग होत आहे. हे थांबविण्यासाठी कृषी विज्ञान केंद्रामार्फत ग्रामीण भागातील महिला, बचत गटातील महिला, युवतींना होळी नैसर्गिक रंग तयार करण्याचे दोन दिवसाचे प्रशिक्षण देण्यात आले. प्रशिक्षणामध्ये पळसाचे फुल, मेंहदी, पालक, बीट, कडू निंबाचे पाने, हळद व नीळ इत्यादींचा वापर करून रंग तयार करण्यात आले. बचत गटातील महिलांनी, युवक, युवतींनी नैसर्गिक रंग तयार करून त्यावर लेबलिंग, पॅकेजिंग करून बाजारात आणावे असे आवाहन गृहविज्ञान विषय विशेषज्ञ कीर्ती देशमुख यांनी केले. या प्रशिक्षणाला अकोला जिल्ह्यातील महिला मोठ्या संख्येने सहभागी झाले होते.