नाशिक : मालेगाव तालुक्यातील वडेल येथील कृषी विज्ञान केंद्र आणि कृषी व्यवस्थापन यंत्रणा(आत्मा) नाशिक यांच्या संयुक्त विद्यमाने ग्रामीण भागातील युवकांसाठी कौशल्याआधारित प्रशिक्षण कार्यक्रमांतर्गत उच्च तंत्रज्ञानावर आधारित फुलशेती हा प्रशिक्षण कार्यक्रमास सोमवारी (ता.२४) सुरुवात झाली असून, हा प्रशिक्षण कार्यक्रम १ मार्च २०२० पर्यंत चालणार आहे. प्रशिक्षण कार्यक्रमाच्या उद्घाटनप्रसंगी तालुका कृषी अधिकारी अशोक पवार, कृषी विज्ञान केंद्राचे प्रमुख अमित पाटील व कृषी विज्ञान केंद्राचे प्रमुख शास्त्रज्ञ उपस्थित होते. हा प्रशिक्षण कार्यक्रम उद्यानविद्या विभागाचे विषय विशेषज्ञ पवन चौधरी विषय यांच्या मार्गदर्शनाखाली राबविण्यात येत आहे. यावेळी पवन चौधरी यांनी ‘फुलशेतीची ओळख आणि संधी’ या विषयावर मार्गदर्शन केले. कृषी विज्ञान केंद्राचे प्रमुख श्री. पाटील यांनी ‘हरितगृह तंत्रज्ञान आणि उभारणी’ याबाबत मार्गदर्शन केले. मृदाशास्त्र विभागाचे विषय विशेषज्ञ विजय शिंदे यांनी ‘हरितगृहातील जमीन आरोग्य व्यवस्थापन’बाबत मार्गदर्शन केले. रूपेश खेडकर यांनी ‘वातावरण नियंत्रण’ याविषयावर मार्गदर्शन केले.