पुणे: राज्यात उन्हाचा ताप वाढल्याने कमाल तापमानात वाढ होत आहे. आजपासून (ता.२०) राज्यात हवामान मुख्यत: कोरडे राहणार आहे. तर उन्हाचा चटका आणि उकाड्यातही वाढ होणार आहे. विदर्भात उष्ण लाट येण्याचा इशारा हवामान विभागाने दिला आहे. मंगळवारी (ता.१९) सकाळपर्यंतच्या २४ तासांमध्ये विदर्भातील अकोला येथे देशातील उच्चांकी ४४.८ अंश सेल्सिअस तापमानाची नोंद झाली आहे.  बंगालच्या उपसागरात आलेल्या ‘अम्फान’ चक्रीवादळामुळे उत्तर व वायव्येकडून कोरडे वारे मध्य भारताकडे येत आहे. त्यामुळे गुजरात, राजस्थान, मध्य प्रदेश, विदर्भात उष्णतेची लाट येण्याची शक्यता आहे. तर राज्याच्या उर्वरीत भागातही उन्हाचा चटका वाढणार आहे. विदर्भ, मराठवाडा, उत्तर महाराष्ट्रात तापमान चाळीशी पार असल्याने उन्हाच्या झळा वाढल्या आहेत. पूर्वमोसमी पावसाला पोषक हवामान निवळल्याने आजपासून (ता. २०) राज्याच्या बहुतांशी भागात कोरड्या हवामानाचा अंदाज आहे.  मंगळवारी (ता. १९) सकाळपर्यंतच्या २४ तासांमध्ये राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३६.२, धुळे ४२.०, जळगाव ४३.३, कोल्हापूर ३५.६, महाबळेश्‍वर २८.९, मालेगाव ४०.०, नाशिक ३७.३, निफाड ३७.०, सांगली ३७.३, सातारा ३५.५, सोलापूर ४१.०, डहाणू ३४.६, सांताक्रूझ ३३.९, रत्नागिरी ३४.२, औरंगाबाद ४०.०, परभणी ४१.८, नांदेड ४०.५, अकोला ४४.८, अमरावती ४१.०, बुलडाणा ४०.०, ब्रह्मपुरी ४०.९, चंद्रपूर ४१.५, गोंदिया ४१.६, नागपूर ४३.०, वर्धा ४२.८.