पुणे : आठवडाभर पूर्वमोसमी पावसाने धुमाकूळ घातल्यानंतर अनेक भागांत मळभ दूर झाले आहे. राज्यात तुरळक ठिकाणी अंशतः ढगाळ वातावरण आहे. मात्र कोकण, मध्य महाराष्ट्र आणि मराठवाड्यात आकाश कोरडे झाल्याने उन्हाचा चटका काही प्रमाणात वाढणार आहे. शुक्रवारी (ता. १६) सकाळी चोवीस तासांत विदर्भातील अकोला येथे सर्वाधिक ३८.६ अंश सेल्सिअस कमाल तापमानाची नोंद झाली असल्याचे हवामान विभागाच्या सूत्रांनी सांगितले. 

राज्यात साधारणपणे २९ मार्चपासून उन्हाचा चटका वाढला होता. परंतु नऊ एप्रिलपासून वातावरणात पुन्हा वेगाने बदल झाले. त्यामुळे दहा एप्रिलपासून पावसासाठी पोषक वातावरण तयार होऊन पूर्वमोसमी पावसास सुरुवात झाली. जवळपास आठवडाभर पावसाने चांगलाच दणका दिला असून काही ठिकाणी गारपीट, मेघगर्जना व विजांच्या कडकडाटासह जोरदार पाऊस पडला. या काळात कमाल तापमानाचा पारा वेगाने खाली आला होता. किमान तापमानातही सरासरीच्या तुलनेत चार अंश सेल्सिअसपर्यंत घट झाली. तर कमाल तापमानात सरासरीच्या तुलनेत सहा अंश सेल्सिअसपर्यंत पारा घसरला होता. पुणे येथे सर्वांत कमी १७.१ अंश सेल्सिअस तापमान नोंदविले गेले. 

अरबी समुद्राचा आग्नेय भाग ते केरळ किनारपट्टी ते उत्तर कर्नाटक, दक्षिण कर्नाटकदरम्यान कमी दाबाचा पट्टा तयार होत आहे. तर उत्तर पश्‍चिम बंगाल व परिसरात चक्रीय वाऱ्याची स्थिती आहे. ही स्थिती समुद्रसपाटीपासून २.१ किलोमीटर उंचीवर आहे. तर विदर्भ व परिसरातही चक्रिय वाऱ्यांची स्थिती असून, ही स्थिती समुद्रसपाटीपासून ३.१ आणि ५.८ किलोमीटर उंचीवर आहे. तसेच ओडिशाच्या दक्षिण व उत्तर परिसरातही चक्रीय वाऱ्याची स्थिती आहे. त्यामुळे राज्यात वातावरणात पुढील काही दिवसांत चांगलेच बदल होण्याची शक्यता आहे.