सटाणा, जि. नाशिक : हरणबारी वाढीव उजवा कालवा आणि केळझर वाढीव कालवा क्रमांक आठच्या कामांचे तातडीने सर्व्हेक्षण करण्याचे आदेश जलसंपदा विभागाचे राज्यमंत्री विजय शिवतारे व प्रधान सचिव सुर्वे यांनी दिले, अशी माहिती बागलाणच्या आमदार दीपिका चव्हाण यांनी दिली.

चव्हाण यांनी दिलेल्या प्रसिद्धिपत्रकानुसार, पश्चिमवाहिनी नदी खोऱ्यांतून गुजरातकडे वाहून जाणारे वळण योजनांद्वारे उपलब्ध झालेले क्र. ५३.०२ दलघफू पाणी हरणबारी व केळझर वाढीव कालव्यांसाठी उपलब्ध झाले आहे. बागलाण हा अवर्षणप्रवण तालुका आहे. या कालव्यांच्या कामांचे सर्व्हेक्षण करण्यात यावे, अशी मागणी राज्याचे जलसंपदामंत्री गिरीश महाजन, राज्यमंत्री विजय शिवतारे यांच्याकडे करण्यात आली होती. त्यानुसार त्यांनी तातडीने प्रधान सचिवांना सर्व्हेक्षणाचे आदेश दिले.

सततच्या दुष्काळी परिस्थिीमुळे शेतकरी आर्थिक अडचणीत सापडला आहे. शेतकरी आत्महत्यांचेही प्रमाण दिवसेंदिवस वाढत आहे. या अनुषंगाने पश्चिम वाहिनी नदी खोऱ्यातून पाणी हरणबारी वाढीव उजवा कालवा पारनेर ते सातमाने व केळझर वाढीव कालवा क्र . आठ मुळाणेपासून वायगावपर्यंत मिळावे, अशी मागणी केली होती. त्यानुसार विधानमंडळ समितीने मंजुरी दिली आहे.