कोल्हापूर : येथील बाजार समितीत या सप्ताहात हिरवी मिरची, गवारीस समाधानकरक दर मिळाला. हिरव्या मिरचीस दहा किलोस १५० ते २२० रुपये दर मिळाला. हिरव्या मिरचीची दररोज तीनशे ते चारशे पोती आवक झाली. गवारीची दररोज तीस ते चाळीस पोती आवक झाली. गवारीस दहा किलोस २५० ते ४५० रुपये दर होता.  गेल्या पंधरवड्यापासून बाजार समितीत दराबाबतचे मंदीचे वातावरण याही सप्ताहात कायमच होते. टोमॅटोची दररोज एक ते दीड हजार कॅरेटची आवक झाली. टोमॅटोस दहा किलोस २० ते १०० रुपये दर मिळाला. टोमॅटोची आवक नियमित असली, तरी एखाद्या दिवशीच दरात थोडी वाढ होत असल्याचे बाजार समितीच्या सूत्रांनी सांगितले. गेल्या पंधरवड्यापासून टोमॅटो, फ्लॉवरला दर नसल्याने शेतकऱ्यांनी हा भाजीपाला अक्षरश: काढून टाकला आहे. यामुळे आवकेतही सातत्य नाही. येत्या महिन्याभरात याचा उलट परिणाम दिसून येणे शक्‍य असल्याचेही बाजार समितीच्या सूत्रांनी सांगितले.  कोल्हापूर शहराजवळील गावांतून काकडीची दररोज शंभर ते दीडशे करंड्या आवक झाली. काकडीस दहा किलोस ५० ते २२० रुपये दर होता. फ्लॉवरची साडेतीनशे ते चारशे पोती आवक होती. फ्लॉवरच्या दरात किंचित सुधारणा दिसून आली. फ्लॉवरला दहा किलोस ५० ते २२० रुपये दर मिळाला. शेवगा शेंगेची ९० ते १०० पोती आवक होती. शेवगा शेंगेस दहा किलोस १५० ते २०० रुपये दर होता. पालेभाज्यांमध्ये कोथिंबिरीस शेकडा ३०० ते ८०० रुपये दर मिळाला. कोथिंबिरीची अठरा हजार पेंढ्यांची आवक झाली. मेथीच्या आवकेत घट होती. मेथीची दररोज चार ते पाच हजार पेंढ्यांची आवक होती. मेथीस शेकडा ५०० ते १००० रुपये दर होता.