सांगली  : लॉकडाऊनमुळे जत तालुक्यातील द्राक्ष बागायतदार संकटात सापडला आहे. तालुक्यातील द्राक्ष हंगाम अंतिम टप्प्यात आला आहे. लॉकडाऊनमुळे बाजारपेठा बंद असल्याने व्यापाऱ्यांनी पाठ फिरवली आहे. द्राक्षाला प्रतिकिलो केवळ २० ते २५ रुपये दर मिळत आहे. गतवर्षीपेक्षा द्राक्षाला कमी दर मिळत असल्याने शेतकरी चिंतातुर झाला आहे. 

जत तालुक्याच्या पूर्व भागातील तिकोंडी, भिवर्गी, करेवाडी, कागनरी परिसरात दोनशे एकरावर द्राक्षाचे क्षेत्र आहे. या परिसरातील शेतकरी मागास म्हणजे नोव्हेंबर-डिसेंबर महिन्यात फळछाटणी घेतात. उशिरा फळ छाटणी घेतल्यामुळे बाजारात द्राक्षाला मागणी अधिक असल्याने दर चांगला मिळतो. या सर्व द्राक्षेबागांचे उत्पादन स्थानिक बाजारपेठेसाठी घेतले जाते. 

एप्रिल-मे महिन्यात विक्री केली जाते. बाजारात हंगाम संपत आलेला असतो, मागणी चांगली असते, दर चांगला मिळतो. गेल्यावर्षी मे महिन्यात ४० ते ५० रुपये किलो भाव मिळाला होता. एप्रिल-मे महिन्यात विक्री करण्यासाठी येणाºया बागांना मोठ्या प्रमाणात पैसा खर्च करावा लागतो. महागडी औषधे, रासायनिक खत, मजुरी, मशागतीसाठी लाखो रुपये खर्च करावे लागतात. यावर्षी अनुकूल हवामानामुळे उत्पादन चांगले आहे. 

परंतु कोरोनाच्या संकटामुळे बाजारात दर कमी झाला आहे. बाजारपेठा बंद असल्याने व्यापारीही आलेले नाहीत. संचारबंदीने विक्री होत नाही. त्यामुळे शेतकरी बेदाण्याकडे वळला आहे. परंतु सर्व बेदाणा शेड मिळत नसल्याने अडचण निर्माण झाली आहे. परिणामी कमी किमतीला बागा विकाव्या लागत आहेत. सध्या २० ते २५ रुपये किलो दराने द्राक्षांची विक्री होत आहे. हा आतापर्यंतचा नीचांकी दर आहे.