नगर ः  लॉकडाऊनमुळे संगमनेर तालुक्‍याच्या पठार भागातील शेंडेवाडी (ता. संगमनेर) या छोट्याशा गावातील शेतकरी गटाने अडीच टन भाजीपाल्याचे मोफत वाटप हातावर पोट असलेल्या मजुरांच्या वस्तीत केले. 

संगमनेर तालुक्‍यातील गुंजाळवाडी ग्रामपंचायत हद्दीतील कंजारभाट, मातंग वस्ती, नाईक वस्ती तसेच ढोलवाडी परिसरात, मोलमजुरीवर चरितार्थ चालविणाऱ्या लोकांचा रहिवास आहे. गुजाळवाडी परिसरातील या मजुरांची स्थिती समजल्याने उत्पादित भाजीपाला या मजुरांना देण्याचा निर्णय शेंडेवाडी येथील श्री स्वामी समर्थ शेतकरी गटाने घेतला. 

सर्व सदस्यांकडून दीड हजार किलो कांदा, एक हजार किलो कोबी, कोथिंबिरीच्या एक हजार जुड्या जमा करण्यात आल्या. कृषी विभागाच्या ‘आत्मा’च्या सहकार्यातून प्रत्येक कुटुंबासाठी दोन किलो कांदे, एक किलो कोबी, गवार व दोन जुड्या कोथिंबीर, याप्रमाणे साडेचारशे कुटुंबांना भाजीपाल्याचे पॅकिंग करून वस्तीवर जाऊन वितरण केले. 

प्रांताधिकारी डॉ. शशिकांत मंगरुळे, उपविभागीय कृषी अधिकारी सुधाकर बोराळे, तहसीलदार अमोल निकम, तालुका कृषी अधिकारी प्रशांत शेंडे, मंडळ कृषी अधिकारी लक्ष्मण भोकनळ, तालुका तंत्रज्ञान व्यवस्थापक वैभव कानवडे, तलाठी पोमल तोरणे, बाळासाहेब वामन, नानाभाऊ उगले, राजू पचपिंड, भाऊ उगले उपस्थित होते.