नगर, : नगर शहराचे माजी आमदार, तत्कालीन युती सरकारमधील अन्न व नागरी पुरवठा राज्य मंत्री अनिल राठोड (वय ७०) यांचे आज पहाटे साडेपाच वाजता हृदयविकाराच्या तीव्र झटक्याने निधन झाले आहे. त्यांच्यावर येथील खाजगी रुग्णालयात काही दिवसांपासून उपचार सुरू होते. त्यांच्या पश्चात पत्नी तीन मुली, एक मुलगा असा परिवार आहे.  अहमदनगर शहरातील हिंदुत्वाचा बुलंद आवाज अशी ओळख असलेले माजी आमदार अनिल राठोड यांनी नगर शहराचे आमदार म्हणून पंचवीस वर्षे प्रतिनिधित्व केले. युती सरकारच्या काळात ते काही काळ राज्यमंत्री होते. सर्वसामान्य जनतेचा प्रतिनिधी म्हणूनही अनिल राठोड यांची ओळख होती. सामाजिक कार्यासाठी त्यांनी काही संस्थांची स्थापना केली. रस्त्यावरील सामान्य कार्यकर्ता ते राज्याचा मंत्री अशी ओळख निर्माण झालेले राठोड यांच्या निधनाने नगर जिल्ह्यात शिवसैनिकांना मोठा धक्का बसला आहे.